من جهة نأخذ الشخشوخة نشللها بالماء (نسوموها) ونصفيها ونلمها على جنب تاع القصعة ونخليها تقطر بهده الطريقة رايح ينزل الماء الزائد أسفل القصعة نشفوه بمنشفة نظيفة ونحلها ونخليها تشيح تماما مرة على مرة نحركها باليد.

لما تنشف الشخشوخة جيدآ ندهنها بالقليل من الزيت حتى نشوف كامل الحبيبات دخل فيها الزيت مليح نحطها في كسكاس حتى تفور

لما نشوف البخار طلع من الشخشوخة ننزعها ونفرغها في القصعة نحلها بواسطة ملعقة خشبية ونحطلها ملعقة كبيرة غير مملوءة طماطم مصبرة ونحلها باليد حتى تدخل الطماطم في كامل الحبيبات(وهدا هو السر الذي يعطيها اللون الأحمر الجميل) ونعاود نردها تفور للمرة الثانية.

كي تفور ننزعها ونفرغها في القصعة ونحط ملعقة كبيرة غير مملوءة زبدة ندخلها في الشخشوخة ونفركها باليد حتى تدخل هي الأخرى ونقيس الحبيبات كامل.

في هده الأثناء يكون الدجاج طاب ننزعوه من المرق وننزع الحمص أيضا نصفي المرق بمصفاة نأخذ قدر آخر نضع فيه ملعقة زبدة ونفرغ عليها الشخشوخة ونضيف لها المرق حتى تتغطى بشكل جيد نحركها ونغطيها ونخليها تتشرب المرق على نار متوسطة لما تنشف نقدمها في صحن مزينة بالحمص والدجاج بعدما حمرتو في القليل من الزبدة حتى يأخذ اللون الذهبي (أنا حمرتو بزيادة لأن زوجي يحب ياكلو هكدا) تاكل مرفوقة أيضا بالحار.