الحشو نجيبو الكاوكاو المرحي ومحمص نضيفولو السكر الاحرش ونخلطو مليح ونشمخو غير بشوية ماء زهر شوية برك مالازمش تكون كمية كبيرة باه الكاوكاو يبقى مزربع وحتى كي طيب البقلاوة متكونش الحشوة مرنخة طيح على جوانب بهاذ الطريقة تكون الحشوة شادة وحاكمة روحها

نرجعو للعجينة بعد ما رتاحت نحلو الكرية الاولى بواسطة الحلال ونرشو عليها النشاء مليح ونحلوها على شكل دائري وتكون الدائرة صغيرة ونحطوها على جنب ونكملو باقي الكريات بنفس الطريقة من بعد نجيبو أربعة دوائر ونحطوهم فوق بعض وبين كل طبقة وطبقة نحطو النشاء بكمية مليحة باه نتحصلو على التوريق من بعد نجيبو الحلال ونحلو الطبقات اللي فوق بعضاهم مرة وحدة حتى نوصلو للسمك اللي بغيناه ونجيبو البلاطة اللي راح نطيبو فيه البقلاوة يكون مدهون بالسمن مليح ونحطو فوقو العجينة اللي حليناها ضرك ونسووها مليح في البلاطو

نجيبو الحشو نتاع البقلاوة ونحطوه فوق العجينة ونسوو الطبقة مليح من كل الجوانب ونخلوها على جنب

نرجعو للعجينة نتاع البقلاوة اللي بقات نحلوها بنفس الطريقة اللي استعملناها من تحت الحشو ونفتحوها مليح ونحطوها من فوق الحشو ونعدلوها مليح ونحيو الزوائد على الاجناب ونقصو البقلاوة نتاعنا الشكل اللي حبيناه سوى مقروطات ولا مربع ولا مستطيل المهم نجيبو حبيبات كاوكاو (فول سوداني) ولا لوز ونرشقوهم فوق حبات البقلاوة ونجيب كمية من السمن الذائب ونصبو فوق البقلاوة وندخلوها طيب في الفرن

لما طيب البقلاوة نخرجوها مباشرة وهي سخونة نعسلوها بكيلو عسل ونخلوها تتشرب العسل مليح ومن بعد نقطعوها ونقدموها وصحتين على قلبكم