نكيل السميد تاعي ونحط الملح ونلمو بالماء لازم تكون طرية ماشي بزاف جارية وماشي يابسة نخليها ترتاع هلى الاقل ساعة بعدها نعجنها مليح حتى تولي ملساء وتذوب الحبة تاع السميد وتطرطق العحينة

بعدها نبوبها نخليها تطرحلي وبعدها نحلها بنشاء على شكل دائري وتكون رقيقة جداً ارق من الخبز السوري نطيبها ونحط الوحدة فوق ختها به تعرق على بعضاها كي نخلص الطياب نحطها في ساشي ونقطعها سوى بالسكينة ولا نفتتها بالضفر

ونوزغها فوق قطعة قماش باه تشيح وتيبسلي مدتها ثلاثة ايام فما فوق كي نحسها ولات كي حبة القمح نسيرها

نفوتها على سيار السقاط باه يطيحلي الفتات ونخبيها من الاحسن نحطو معاها حبيبات الفلفل الاسود باه متسوسش من حرارة الجو فلفل اسود حب ماشي مطحون

كي نستعملها نفورها وهيا يابسة بعدها نغسلها بالماء اي نسومها ونرغها في قصعة ونخليها تشيح كي تشيح نضيفلها القليل من الزيت ونرجعها تفور ونحط من فوقها طرشونة باه تحبس لوفار داخلها وتقعد مرزعا مدة ساعة على الاقل يمكن ساعتين

ننصب المرقة تاعي عادية كل واحد وطريقة النصيب تاعو كي تجهز المرقة في طنجرة نفرغ الشخشوخة والمرقو لازم تخمها ونخليها تنشف من المرق حتى تطرالي تحتاج المرقة اقل من التليتي واي استفسار اكتبوهلي فالتعليق

اذا حبيتو شخشوخة الضفر تاع الزيت ولي ننصبوها في نهارها اكتبولي فالتعليق ونحطهاكم جي بزااااف بنينة وخفيفة على هاذ الشخشوخة العادية