اول شي بنضف الدجاجة من جوا منيح وبنفركها بالملح عشان اي اشي زيادة من احشاء الدجاجة يطلع وبعدين بنضفها من برة منيح بخلي الجلد عالدجاجة بس بنضف من تحته بنفس الطريقة بمد ايدي تحت الجلد وبفركها بالملح وبشيل كل الشحوم البيضا اللي بتكون عالقة عالدجاجة وكمان الشحوم اللي بالجلدة جوة ازا بتقدري شيليها وبس تفركيها بالملح منيح اشطفيها بالمي وديري بالك تتمزع معك الجلدة وديري بقلبها خل وعليها من برة واتركيها منقوعة بالخل ساعة تقريبا عشان كل الدم يطلع

هلأ خلال والدجاجة منقوعة بالخل بفرم البصلة نااعم كتير وبقلبها بشوية زيت وبكون غاسلة الفريكة ومصفياها وبقلبها مع البصلة وشوية بهارات وملح وهيل وكاسة الفريكة بدها كاسة وربع مي زي الرز بتعمليها بس تتشرب المي وطي عليها لحتى تنشف وما بتكون مستوية تماما لانها لسا رح تنحط بالدجاحة وبالفرن بعدها بتستوي منيح

هلأ بتكون الفريكة جهزت بنرجع للدجاجة بنشطفها بالمي كمان مرة وبنجيب صحن بنحط فيه معلقة بهار كبيرة ومعلقة هيل ومعلقة زنجبيل ومعلقة قرفة صغار المعالق مو كبار بس البهار كبيرة هلأ اخلطي البهارات مع بعض واعصري عليهم ليمونة وشوي زيت زيتون وادهني بالخلطة هاي الدجاجة من جوا ومن تحت الجلد ومن فوقه

هلا بنجيب الفريكة بنحشيها جوا الدجاجة ما تكون محشية كتيير تلت ارباعها يكون بس محشي لانها لسا رح تنفش الفريكة لسا جوا الجاجة وبسكرها يا بنكاشة سنان او بخيطها بخيطان ماكنة انا بحب اخيطها اكتر 😆

وسكريها من الطرفين من الرقبة ومن تحت وحطيها بكيس للشوي واخزقيه من طرفه شوي وحطيه بصينية فيها شوية ماء ودخليها الفرن ساعة تقريبا بدك تختبري ازا استوت او لأ بتغزي فيها شوكة من عند صدر الدجاجة ازا فاتت بسهولة بتكون استوت

هلا بتفكي كيس الشوي وبتكوني محضرة خلطة التحمير بتدهني فيها الدحاجة وبتحمريها وبتقدميها متل ما بتحبي انا فلفلت فريكة تحتها وقدمت جنبها لبن وسلطة وممكن تزينيها بالمكسرات او تحطي مع الحشوة مكسرات بس انا ما بحط مع الحشوة مكسرات بتكون طرية وما بتقرش مو زاكية يعني عالفاضي بحطها برة مع الفريكة اللي تحت الجاجة بتضلها لزيزة وبتقرش وصحة وهنا