اول اشي بنرفع من مقدار السميد (ال 2 كيلو) 3 كاسات عجنب للحشوة وبنحط باقي السميد والطحين والكركم بجاط هلأ بنكون سيحنا السمنة بس مو سخنة دافية عادي ما تكون بتغلي بنحط فوقهم السمنة والزيت وبنبلش نبس فيهم فرك براحة ايديكي مو عجن لحتى يشرب السميد كل السمنة والزيت بكون عجنب حاطة الخميرة بالمي الدافية والسكر ولما ترتفع الخميرة بديرها فوق خليط السميد والطحين وببلش لم السميد واضافة الحليب الدافئ بالتدريج لحتى تتماسك العجينة وتصير ناعمة وقابلة للفرد بالصينية بتكون مو جامدة ولا رخوة انا اخدت معي تقريبا 3 كاسات حليب دافئ

هلأ بنحضر الحشوة بنخلط جميع مقادير الحشوة ما عدا الماء بنبلش نرش المي شوي شوي لحتى نبلل جميع الحشوة الخطوة هاي عشان تتماسك الحشوة وما تفتفت بس ما بتاخد مي كتير ما بتكون عجينة بس بتكون لما ترصيها متماسكة زي ما قلت بس رشات مي خفيفة ما تديري مي عليها كتير ما بتوخد معك نص كاسة مي

هلأ بنرجع للعجينة بنحضر صينية كبيرة لأنه الكمية كبيرة وبندهنها طحينية وبنقسم العجينة من النص بناخد اول نص وبنفرده بالصينية بشكل متساوي استعملي صينية كبيرة كتير شنو انا استعملت صغيرة طلعت طبقة السميد معي خميلة كتيير وما بين طعم الحشوة كتير لاحظتو بالصورة اكيد

هلأ بنحط كل الحشوة فوق الطبقة الأولى وبنرصها منيييح اضغطي عليها لحتى تتماسك وتلزق بالطبقة اللي تحتها

هلأ بنبلش نوخد اقراص من النصف التاني ونشكلها بايدينا عشكل دوائر بنبسطها براحة الإيد وبنغطي فيها الوجه بنكرر العملية لحتى يتغطى كل وجه الصينية ترقيع يعني 😅

هلأ بمنقاش الكعك او بطرف الشوكة بنخط او بنقش الوجه وبقطع الصينية وبخبزها بالفرن بتكون النار تحتها لحتى تتحمر الجوانب بعدين بحمر الوجه وصحتين وعافية زاكية كتير بنصحكم تجربوها مع انها طلعت خميلة معي شوي😆 بس زاكية ما تنسو متل ما قلتلكم استعملو صينية كبيرة شوي ازا رح تعملو نفس الكمية