في إناء نبدأ نطلع البياض بالخلاط الكهربائي على سرعة قليلة ثم نبدأ نزيد في السرعة تدريجيا بعد مايطلع نبدأ نضيف في السكر العادي على دفعات مع الاستمرار بالخلط حتى نتحصل على بياض كالثلج و متماسك (كي نقلب الطبسي ميطيحش البياض) ثم نغربل الفرينة (طحين) مع السكر الناعم و نبدأ نزيد فيهم بشوي مع البياض و ندخلهم بملعقة خشبية عن طريق الخلط من الاسفل الى الاعلى باش منهبطش البياض ثم نحطو في ايطار و نفرشلو ورق الزبدة من الاسفل (الايطار20سم) و نطيبو(ماتدهنيش الايطار لانه ميلصقش)

نحط الشوكولاته البيضاء تذوب في حمام مائي ونمر نرحي البيستاش كي يولي بودرة نزيدلو ملعقة الزيت و نزيد نرحيه حتى نتحصل على عجينة نحي قيس نص فنجان صغير من الكريمة و نطلع باقي الكمية بالباتور و نسخن هاذيك الكمية لي نحيناها و نضيفلها الجيلاتين لي نكونو رطبناها في ماء بارد (عادي ماء الحنفية) و نحركها حتى تذوب ثم نضيفهم للشكلاطة و نضيف معاهم عجينة البيستاش.

نخلطهم جيداً و نبدأ نضيفلهم الكريمة لي طلعناها تدريجيا و نحرك بالملعقة من الاسفل الى الاعلى حتى يتجانس الخليط نفرضو فوق الجينواز وندخلو للثلاجة يبرد ويتماسك(من الحسن نخليوه ليلة كاملة)

نمر للتزيين نحل عجينة السكر على سمك رقيق و نقطع بالمول لي طيبنا بيه الجينواز ز نزينها بخطوط شوكولاته بيضاء ملونة بالاخضر و كريات الڨوفريط و حبات البيستاش لي خليناهم و ورد مجفف