بفتيك لحمة لذيذ جداً
البفتيمك ماما عمرها ما عملته دايما تقولي انها مبتعملوش لانها لما عملته زمان كان بيشد ومظبطش معاها
خدتها انا تحدي مع نفسي اني هعمله وادوقهولها ويظبط معايا ويعجبها وفعلا جربت كذا طريقه لحد ماوصلت لاجمل واحلى طعم ومكنش شارب زيت (ودي اهم نقطه عندي) ومستوى جداً
بفتيك لحمة لذيذ جداً
البفتيمك ماما عمرها ما عملته دايما تقولي انها مبتعملوش لانها لما عملته زمان كان بيشد ومظبطش معاها
خدتها انا تحدي مع نفسي اني هعمله وادوقهولها ويظبط معايا ويعجبها وفعلا جربت كذا طريقه لحد ماوصلت لاجمل واحلى طعم ومكنش شارب زيت (ودي اهم نقطه عندي) ومستوى جداً
إفتح في تطبيق كوكبادالخطوات
- 1
قبل مانبدأ فأي حاجه لازم لما نجيب البفتيك نفرده على لوح التقطيع وندقه كويس بالمدق من الناحيه الحاده او ممكن باي حاجه تقيله لان مهما كان الراجل دقه لازم نرفعه اكتر في البيت عشان يستوي معانا كويس وميشدش بعد السوا وكمان الناحيه الحاده من المدق بتفتح الانسجه عشان تشرب التبيله حلو وتستوي احسن
- 2
هنجيب بصله متوسطه ونحطها في الكابه ونبشرها بشر متوسط مش ناعم اوي (متبقاش زي العصير ولا تبقي قطع كبيره تكون وسط)
- 3
نأخذ البصله لما تتبشر ونحط فوقها توابلنا ملح رشه شطه حسب الرغبه فلفل اسمر وكمان نحط رشه كمون ورشه جوزه الطيب (منزودش عن رشه فالكمون وجوزه الطيب عشان نأخذ طعم حلو من غير ماتغير طعم اللحمة) ونضيف نص ملعقة صغيرة توابل لحمة وبردو منزودش عشان متطغاش على طعم اللحمة
- 4
هندعك البصله والتوابل دي كويس جداً مع بعض بادينا والخطوه دي مهمه جداً لانها بتطلع طعم البصل وبتديله ريحه وطعم تاني خالص احسن من اننا نضيف ونقلب وخلاص ولما ندعكها كويس وتطلع ريحه البصل مع التوابل هنضيف عصير نص ليمونه كبيره ومعلقه زبادي ومعلقه خل ونقلب كويس وبعدها هنضيف البفتيك ونقلبه كويس جداً ونوزع التتبيله عليه كله وهنسيبه فالتتبيله اقل حاجه ساعتين والمفروض 4 ساعات وممكن ليله في الثلاجه
- 5
ملحوظه انا جربت استخدام ماء البصل ماء البصل بتدي طعم جميل بس بشر البصل كمان طعمه احلى وعن تجربه ومشكلة ماء البصل ان لما البفتيك بيمتصها وبنيجي نقليه بيشرب زيت كتير جداً ومش ضمان ان الكفر ميفكش انا جربتها اما بالنسبه للتتبيله اللي فيها بصل مبشور مش بتفصل الكافر ولا حاجه لاني بنزل كل البصل بايدي من على شريحة البفتيك قبل ماحطها في البيض وعشان كدا قلت البصل ميبقاش ناعم اوي عشان تعرفي تنزليه كله وميبقاش خشن اوي عشان تاخدي الطعم كله منه
- 6
ملعقة الزبادي ومعلقه الخل بيطرو البفتيك جداً ويساعد في السوا وطعمها مالوش اثر بشرط منزودش عن معلقه واحده لكل منهم والا هيتغير الطعم جربي طريقتي والله احلى طعم بعد تجارب كتير
- 7
بعد ماتتبل كويس اللحمة اقل حاجه ساعتين والاحسن من بليل فالتلاجه هنأخذ البفتيك ننفضها من البصل تماما ونحط الكميه كلها مره واحده في بيضتين عليهم رشة فلفل اسود ومعلقتين لبن ونقلب كويس وبعدين نطلع واحده واحده نحطها في ميكس من (الفيجيتار الحار على البقسماط بنسب متساويه) ملحوظه الفيجيتار الحار مش حراق بس توابله اطعم من العادي وممكن نحط ملعقة نشا عشان اللون بتاع الكافر ميغمقش بسرعه في الزيت وطعم الفيجيتار لما بيتحط على البقسماط بيتبله وبيفتح لونه وبيدي للكافر طعم احلى من البقسماط لوحده
- 8
ملحوظه ممكن تستبدلي الفيجيتار لو مش متوفر عندك بالدقيق ومعلقه من النشا فيبقي الخليط اللي هاتحطيه عباره عن (بقسماط + دقيق بنسب متساويه+ ملعقة نشا) الدقيق والنشا عشان البقسماط لوحده بيتحرق في الزيت بسهوله لو طولتي ويغمق بسرعه جداً
- 9
هنشيل البفتيك بعد ماحطيناه في خليط القسماط في الفريزر ربع ساعة عشان الكافر يمسك ونطلعه ننزله في زيت سخن عليه ملعقة سمنه بتفرق جداً فالطعم ولازم يكون سخن فالبدايه عشان الكافر يمسك عليه كويس (لو الزيت مش سخن هيشربه البفتيك ويفك الكافر) بعد مالكافر يمسك نفسه ويبدا يلون ذهبي فاتح هنخلي النار وسط (الحراره الهاديه اوي بتخلي البفتيك يشرب زيت كتير) ونقلبها بعد ماتاخد لون من اول جنب ومنقلبهاش كتير عشان متفكش الكافر
- 10
البفتيك لو متتبل بزبادي واتدق كويس مش هيطول عن 10 دقائق في الزيت على حراره عاليه اول دقيقتين وبعدين حراره متوسطه ونطبق الملاحظات اللي قلتها عشان هي دي اللي هتخلي البفتيك يستوي وميشربش زيت ولما يستوي بنطلعه على مناديل مطبخ مده 5 دقائق وبعدين نشيلها نحطها في طبق التقديم وبألف هنا
كلمات ذات صلة
وصفات مشابهة
وصفات ننصحك بمشاهدتها
التعليقات