सारणासाठी आधी एका भांड्यात तूप गरम करून त्यात खसखस साधारण अर्धा मिनिट परतावी. मग त्यात खवलेले ओले खोबरे घालून 2 मिनिट भाजून घ्यायचे. त्यानंतर त्यात गुळ घालून चांगले मिक्स करायचे. गुळ वितळून झाल्यावर त्यात वेलचीपूड व जायफळपूड घालून मिक्स करायचे. 2 ते 3 मिनिटे परतायचे आणि गेस बंद करायचा. आपले सारण तयार आहे. तुम्हाला हवे असले तर तुम्ही यात ड्रायफ्रूट्स पण घालू शकता. खसखससोबत ड्रायफ्रूट्सही भाजून घ्यायचे.

आता कव्हारिंगसाठी एका भांड्यात पाणी उकळायला ठेवायचे. पाणी उकळले की त्यात मीठ, तूप आणि केवडा वॉटर घालायचे. पाण्याला चांगली उकळी आली की त्यात तांदळाचे पीठ हळू हळू घालत मिक्स करत रहायचे. गॅस बंद करायचा आणि पीठ चांगले मिक्स करायचे.

आता पीठ थोडे गार झाले की थोडे थोडे पाणी घालून हाताने मरदून कणिक मळून घ्यायची. मळलेल्या कणकेवर ओले कापड झाकून ठेवा ठेवायचे. आता मोदक उकडायच्या चाळणीला तप किंवा तेल लावन त्यावर बटर पेपर लावायचा. (तुम्ही केळीचे पानही ठेऊ शकता)

आता मोदक करायला घ्यायचे. मी जरा मोठाच गोळा घेतला होता. पहिल्यांदाच करत होते म्हणून. थोडे तूप लावून हातानेच मोदकाची पारी मोठी करून घ्यायची बोटांच्या सहाय्याने. मग त्यात सारण भरायचे आणि पाकळ्या पाडायच्या नेहमीच्या मोदकाप्रमाणे. पण एकदम हलक्या हाताने. नाहीतर मोदक मोडतात. मी वेगवेगळे आकार देण्याचा प्रयत्न केला आहे..

आता तयार केलेल्या मोदकाच्या चाळणीमध्ये बनवलेले मोदक ठेवायचे. कढईमध्ये थोडे पाणी गरम करायला ठेवायचे. त्यावर ही मोदकाची चाळण ठेवायची आणि त्यावर झाकण ठेऊन 15 ते 20 मिनिटे मध्यम आचेवर मोदक उकडून घ्यायचे.

उकडीचे मोदक तयार