اولا نوجد كريمة الزبدة نبدا السيروا هو الاول نحط السكر مع قطرة ماء في كسرونه نخليه يطيب حتى يلحق 117درجة.. باش تعرفيه طاب اذا ماعندكش محرار استعملي ملعقة ديريها في شوية ماء ودخليها داخل السيروا كي تخرجي المغرف وتقدري تحكمي هذاك السيرو وتشكلي منو كرية معناه راه جاهز اذا لقيتيه مزال سايل معناه مزال مالحقش 117درجة

من جهة اخرى نوجدو البخانا نحطو السكر في وعاء ونخليه حتى يولي كرامال ونرمي فيه اللوز ونحمصو فيه من بعد نصبوا في صينية تكون مدهونة بالزيت ونخليه حتى يتماسك تماما من بعد نطحنوه ونتحصلوا على البخانا

بمجرد ما يطيب السيروا تاعنا نحط حبتين بيض في وعاء مع الفاني ونبدوا نضربوهم بالخلاط ونضيفوا السيروا بالتدريخ ونخفقوا حتى نكملوا كامل الكمية ونضيفوا القليل من البخانا داخل الخليط وهو سخون باش يذوب ويمدلنا طعم هايل

نبقى نخفق في الخليط حتى يذوب تماما ثم نبدوا نضيفوا الزبدة بالتدريج ونخفقوا حذاري تضيفوا الزبدة والخليط تاعكم مزال مابردش لانو راح تذوب ومراحش تطلع معانا

كي توجد الكريمة نجيبوا الجينواز تاعنا ونقسموه على اثنين او ثلاثة حسب الرغبة نحط الطبقة الاولى ونشربها بالشاربات ثم نضع الكريمة ونضع الطبقة الثانية ونشربوها ونبدا نزين الكيكة بطلائها من الخارج بالزبدة ثم تزيينها حسب الرغبة.. انا هذاك البخانا لي بقالي زينت بيه الكيكة على الجوانب ومن فوق والطعم ولا اروع ودرتلها كرامال من فوق