قبل مانبدا في الوصفة و طريقة تحضيرها حبيت نشرحلكم انه هذه القاطو يجي معسل في قلبه هايل لانه محشي بجوز الهند و جوز الهند معروف يتشرب العسل يبقى معسل داخل لكن لي ماتحبش جوز الهند تقدر تعوضو بكاوكاو محمص مرحي نجمعه بالمربى يمكن ايضا مزج كاوكاو مع حلوة ترك اختياري بالنسبة للكمية استعملت 500غ مرغرين تقدري تديري 250غ و تنقصي في السكر طبعا ديري كأس واحد فقط و البيض تقدري تستعملي صفار مع بيضة او صفارين مع بيضة مايأثرش.

ثم نوجد العجينة نخلط المرغرين مع السكر و البيض و الكاكاو بالنسبة للكاكاو خياتي انا نستعمل بدون سخاء ندير و نخلط حتى نشوف الخليط ولا بني كيما موضح في العجينة نحبها تجي بنية بزاف خاصة اذا كان كاكاو نوعية مليحة و كي يتعسل يمد واحد النكهة و يتعدل في الحلاوة نزيد الخميرة و الفرينة تتشكل عندنا عجينة طرية نشكلها كريات كيما موضح في الصورة ثم بأصبعي نشكل حفرة داخل كل كرية نحشيها بكرية من حشو جوز الهند و نغلق عليها جيدا نظن الى هنا الفكرة مشروحة و مفهومة

ثم نجيب الكرية نحطها في قالب راني صورتلكم القوالب لي عندي و لي نستعملهم لي ماعندهاش قوالب كيما هادو تقدر تستعمل قالب تاع المعمول تحط ورق سيلوفان باش تخرج الحبة بسهولة اما هذه القوالب مانستعملش سيلوفان لأنه القالب عندو عفسة من جهة التحتانية تضغطي عليه تخرج الحبة بسهولة

راهي ميبنة ديك العفسة لي نطبعها من تحت باش تخرج الحبة حلوة ثم نحطهم في صينية فرشتلها ورق طبخ طبعا مش شرط ورق طبخ لكن اذا توفر استعمليه ندخلهم يطيبو

كي يخرجو من الفرن مباشرة هما سخونين نغطسهم في عسل بارد انا نستعمل عسل مشري نخففو شوية نضيفلو سواء شربات خفيفة للعسل او ماء زهر خليهم حوالي دقيقة في العسل لازم يتشربو و يدخل العسل لقلب الحشو و خرجيهم من العسل زينيهم من فوق بمكسرات او جوز الهند او ممكن حلوة ترك حسب رغبتك و هنا قسمتلكم حبة تشوفوها داخل كيف جات