باسم الله على بركة الله نبدو كملاحظة انا كنت كيلت السميد بعلبة بلاستيك متوسطة الحجم ولي مفهمتش والا البلاطو تاعها مختلف على قياس البلاطو لي خدمت بيه جيبي السميد وعمري ثلث البلاطو تاعك وفرغيه في كاش حاجة واقسميه على 4 كيلات متساويين الكيلة لي تعبري بيها كملي كيلي بيها خليط الماء وماء الزهر بالنسبة للحشو جيبو البلاطو حطو المكسرات المرحية لازم تكون ربع البلاطو وفرغوها وحاولو تقسمو الخليط على اربعة تتحصلو 4 كيلات نفس الكيل لي تكيلو بيه المكسرات كيلو بيه السكر 😊

نرجعو للوصفة حطي السميد السكر الملح والفانليا غربلي الكاكاو البني هنا ضروري يكون كاكاو بني نوعية جيدة لان رح يختلف الطعم اخلطي جميع المكونات الجافة ضيفي السمن الذايب والبارد مع الزيت وبسيهم جيدا حكي الخليط بين يديك جيدا لمدة لا تقل عن 5 دقائق حتى يصبح الخليط يشكل كرة في يدك غطي الخليط واتركيه على الاقل ساعتين ومن المستحسن ليلة كاملة

نجو للحشو حطي اربع كيلات مكسرات لي عندك انا استعملت كاوكاو مع اللوز محمصين ومرحيين متوسط حطي السكر والفانيليا ورشة ملح لتعدؤل الطعم ضيفي الزبدة الذايبة واخلطي ثم رشي عليها ماء الزهر واخلطي بالاصابع هي الطريقة نفس طريقة حشو البقلاوة نرجع للعجين في نفس العلبة لي عبرت بيها السميد نحط نصف كيلة ماء الزهر وبياض بيضة ونكمل بالماء حتى نتحصل على كيلة غير ربع ونخلط الكل ونبدا نضيفو على خليط السميد بدون عجن ونتركو يرتاح ربع ساعة ونقسمها على 2 هنا نجي للصينية مقاسها 30/40

نحط النصف الاول من العجين نحاول نوزعو ككتل في الصينية بعدها نقوم بتسويته مثل ما موضح في الفيديو بدون ضغط انا هنا مكنتش نضغط بزاف غير باش نسوي الوجه وتجي طبقة مستوية

بعدها نحط الحشو نحاول نوزعو بعدها نسويه مع ترك فراغ صغير بينو وبين ظهر الصينية كما هو موضح في الفيديو

ونرجع نوزع النصف الثاني من العجين بعدها نسويه

نخلي الصينية ترتاح مدة ساعتين و ندخلها للفرن على درجة حرارة 180 حتى تشوفيها طابت من تحت اشعلي عليها من فوق حتى تكمل طياب بلا ما تاخذ لون غامق بخرجها من الفرن ونعاود نقسمها بالسكين بشوية باش ما يتكسروش الحبات ونعسلها بعسلة ثقيلة بدون اضافات انا هنا منقدرش نحدد كمية العسل لان السمبد كاين يشرب كاين لا منعرف كي تشوفوها نشفت زيدولها عسلة انا الصراحة عسلتها 2 مرات وخلوها حتى تشرب مليه من المستحسن تبقى ليلة او 24 ساعة باش تحكم روحها وتقطعوها بسهولة

هنا كنت زينت النصف الفارغ من كل حبة بشكةلاطة الطلي وزينتها بالبندق والكوكاو ايفيلي البنة روعة بنين بزااااف يستحق التجربة ان شاء الله تجربوه وتخلولي كوكسناب تاعكم هنا وتجاربكم ولا تنسو زيارة صفحتي على الانستغرام Senorita_amarita😊❤