في بولة نحط المكونات الجافة..دقيق ، بيكنج بودر ، رشة زعتر ، وسمسم ، رشة ملح ، السكر ، الخميرة ، كوب زبادي وننزل عليهم بالمواد السايلة اللبن والزيت و ونعجن ب ماء دافئ لحد م العجينة تتماسك ونمسحها مسحة بالزيت ونغطيها ونسيبها تتخمر ساعة في مكان دافي

هنقطع السجق لقطع صغير وهنقطع البصل والتوم والطماطم والفلفل قطع صغيرة

هنشوح البصل والتوم لحد ما يدبلو شوية وياخدو لون بعدها ننزل عليهم بالفلفل والطماطم ونقلب شوية بردو

بعدها ننزل عليهم بالسجق والبهارات مع التقليب المستمر وبعدها نوطي عليهم ونسيبهم لحد ما يستوي كلو مع بعض ونطفي..

كيلو ونص دقيق عملي ٥ صوااني حجم متوسط قسمت العجينة ل ٥ كور قد بعض وبفرد العجينة في صواني مدهونة زيت

للحشو بجيب ال ٤ معالق كبار صلصة متدوبين في شوية ماية صغيرين علشان تخف شوية واحط عليهم معلقة زيت كبيرة وزعتر واقلبهم كويس وابدا اوزعها علي العجينة بتعتي

وابدا انزل عليها بالسجق واوزعه وبعدين ارش عليه الزيتون واللانشون وادخلها الفرن علي درجة ١٨٠

لم تطلع مالفرن ابدا اوزع عالوش الجبنة الرومي والموتزريلا واولع عليها الشواية من فوق يادوب الجبنة تسيح معايا بس واطلعها وبس كدا 🫶