اول خطوه هي الحمص: ننقع الحمص ليله كامله والتسويه هنحط له ماء جديده غير ماء النقع ونسيبه يغلي ونضيف ملح كمون كزبره رشة فلفل اسود ربع مكعب مرقه دجاج وبعد ما يغلي نهدى النار لحد ما يستوى

بالنسبه لبصل التقليه هنقطع ٣ بصلة جوليان شرائح رفيع جداً ونحط عليهم ملعقة دقيق ومعلقة نشا ونقلبهم كويس ونقليهم في الزيت الساخن ولما يوصل اللون للذهبي هتخرجهم على مناديل مطبخ دقيقتين بس يتخلصو من الزيت ونشيل المنديل ونسبهم مكشوفين عشان ميبقاش طري ويفضل مقرمش

هنحتفظ بزيت قلي البصل لكل الخطوات القادمه

بالنسبه للعدس هنستخدم كوب الا ربع عدس بجبه هنغسله ونسلقه لمده ١٠ دقائق فقط من بعد الغليان في ماء عليها رشة ملح ورشة كمون

بالنسبه للرز انا بحب اسويه لوحده عشان لونه يكون فاتح بعيد عن العدس وعشان بحب طعم الرز يبان وطعم العدس ميطغاش عليه ولا يغمقه... في معلقتين من زيت تقلية البصل هنشوح كوب الرز بسيط ونضيف كوب ماء مغلية وربع ملعقة صغيرة ملح وربع مكعب مرقة دجاج كل ده على نار عاليه اول ما الرز يشرب مايته نخفف النار ونغطي الرز ربع ساعة بالظبط ونطفي ومنرفعش الغطا نسيب الرز يكمل سواه بالبخار

بالنسبه للمعكرونه هنستخدم ضعف كمية الرز يعني ٢ كوب انا بستخدمهم الاتنين من المعكرونة المرمريه الصغيره خالص بفضلها لانها سهلة بالذات للاطفال لكن انتو ممكن تنوع بين الاسباجيتي والمعكرونة العاديه او اي شكل تفضلوه كوب وكوب وهنسلقها عادي

بالنسبه للصلصه والدقه هنشوح راس ثوم مفروم في ٤ ملاعق زيت من تشويح البصل اول ما ريحتهم تطلع وقبل ما لونهم يغير هنحط عليها ربع كوب خل وناخد نص الكميةدي للدقه والنص الباقي هنضيف عليه الصلصه البيوريه اول ماتتشوح هنضيف عصير الطماطم مع نصف ملعقة كمون ونصف ملعقة كزبره ورشة فلفل اسود ونصف مكعب مرقه دجاج والملح واول ماتغلي نهدي النار ونسبها تتسبك

بالنسبه للدقه هنضيف على خليط الثوم والخل اللي شوحناهم كوب ماء الحمص + ربع كوب خل كمان وعصير ليمونة ورشه من كل من (ملح وكمون وفلفل اسمر وكزبره)

بالنسبه للشطه على النار هنحط معلقتين من زيت تشويح البصل ونحط ٢ ملعقة كبيره شطه بودر ونقلب الشطه في الزيت لحد ما لونها يظهر اكتر واول ما تتشوح الشطه ننزل بكبشه صلصة ونسبها تندمج مع بعضها دقيقتين ونطفي النار

هنجهز الطبق بالشكل النهائي: كبشه رز كبشه عدس بجبه و٢ كبشه معكرونه وكمية صلصة حسب التفضيل وعلى الوجه كبشه من الحمص وبصل التقليه