نحضر كل مكونات الجينواز ونبدأ على بركة الله، في إناء نحط البيض ورشة الملح نضرب شوية بالباتور (الخلاط الكهربائي) حتى يصبح الخليط رغوي.

ملاحظة: ✔هذه الجنواز ناجحة من أول تجربة.

ثم نبدأ نضيف السكر بالتدريج مع الخفق المستمر نضرّب حتى يتضاعف الخليط ويصبح قوام كريمي ويبياض، نضيف الزيت بالتدريج مع الخلط المستمر حتى تنسجم المكونات.

ثم نضيف بودرة الفانيلا ومن بعد نضيف النواشف (الفرينة والمايزينة الخمارة) نكون غربلتهم بطبيعة الحال نضيفهم على 3 دفعات.

وفي هاد المرحلة نستعمل السباتولا ونخلط من لفوق لتحت باش ما نخرجش الهواء. نصب الخليط في صينية 35/25 مفرشة بورق الزبدة

نسوي السطح بالسباتولا ثم بالفرشيطة (الشوكة) كما هو موضح في الفيديو، ونهز الصينية ونخطبها فوق سطح العمل باش يخرج الهواء ويصبح السطح متساوي.

ندخلها للفرن المسخن مسبقا على درجة حرارة متوسطة دات معايا تقريبا من 12 دقيقة كحد أقصى حمارتلي من فوق بلا ما شعلت عليها لازم هاد الجينواز تعسوه منين يكون في الفرن ما لازمش يطول لخاطر ينشف ويتكسّر. كي يطيب نقلبه فوق صينية نكون درت فيها ورق الزبدة ونحي ورق الزبدة اللي طابت فيه غير بالعقل، ونخليها تبرد بجيه، قطعت الجينواز إلى 3 قطع متساوية ما بقاليش كامل لي شوت نغلفها ببابي فيلم وندخلها للثلاجة تبرد مليح.
ملاحظة: يمكن تحضرو الجينواز بليلة من قبل أما إذا ما كانش عندكم الوقت خدموها الصباح باش تبرد مليح

في هاذ الوقت نحضر الشاربات في كاسرونة حطيت الماء والسكر وشريحتي الليمون فوق النار كي بدا يغلي حسبت 10 دقائق وطفيت عليه وخليتو يبرد مليح
ملاحظة مهمة: ✔الكاس سعته 250 ملل.

ثمّ حضرت كريمة الشانتي، في إناء حطيت كاس بودرة الشانتي مع كاس ماء من الحنفية الحليب بودرة مع مركز عطر الفاني وخلطت بالملعقة حتى انساجمت كل المكونات، دخلتها للمجمد مدة 15 دقيقة، كنت 👈🏻حطيت الطريقة من قبل بالتفصيل يمكن تصفحها من خلال هذا الرابط👇🏻
ملاحظة مهمة: ✔الكاس المستعمل هنا سعته 350 ملل.

خرجتها من المجمد وضربها بالباتور (الضراب الكهربائي) حتى تضاعف الحجم إلى 3 أضعاف وأصبحت كريمة ثقيلة، راها تطلع في وقت وجيز.

نجي لتركيب الكيك، حضرت المكونات اللي نستعملهم في حشو الطبقات (الموز مقطع شرائح، التوفي كراميل مع الشوكولاتة للدهن)، حطيت قطعة الجينواز الأولى في القاعدة وشربتها بالشاربات اللي كان بارد.
ملاحظة مهمة: ✔يمكن إستبدال الشاربات بعصير البرتقال

ودرت الكريمة كنت حطيتها في جيب حلواني باش نسهل العملية وتعطيني كمية متساوية، سرحت الكريمة مليح وحطيتها صاير داير (تساعد باش المكسرات ما تخرجش من بعد) وفي الوسط حطيت توفي كراميل كمية معتبرة وضفت فوقها الجوز مقطع قطع صغيرة.

ثم حطيت القطعة الثانية من الجينواز (جزئين ولاقيتهم) وشربتها بنفس الطريقة ثم وزعت الكريمة وسويتها مليح كيما درنا في الطبقة اللي قبل.

عاود درت الكريمة صاير داير كما هو موضح ثم فرغت كمية معتبرة من شوكولاتة الدهن ومن فوق حطيت قطع صغيرة من الموز ثم ضفت الطبقة الثالثة من الجينواز.

شربتها بنفس الطريقة ثم وزعت الكريمة وسويتها مليح كيما درنا في الطبقات اللي قبل. غطيتها ببابي فيلم (بلاستيك غذائي) ودخلتها للثلاجة مدة نصف ساعة.

كي فاتت نصف ساعة خرجتها من الثلاجة ونزعت الإطار المربع، ولبستها بما تبقى من الكريمة، حاولت نملسها مليح ونعطيها شكل مستوي ودرت خطوط بهاد الأداة على شكل مشط على كل الكيكة كما هو موضح في الفيديو.

الكريمة اللي بقاتلي زينت بيها من فوق على شكل الضفيرة صاير داير كما هوموضح في الصور وفي الوسط فرغت فيه صلصة الشوكولاتة اللذيذة كنت 👈🏻حطيت الطريقة من قبل بالتفصيل يمكن تصفحها من خلال هذا الرابط👇🏻

زينها بوردة في الجنب ورشة خفيفة من العقاش الملون الصغير (صالح للأكل) وقلوب ذهبية في كل زاوية، وها هي ذي واجدة.

وقدّمتها بألف صحة وهنا 👌🏻🎂👌🏻

جات بزاف بزاف بنينة 😋🍫😋وخفيفة 👌🏻🍫👌🏻 وشهية طيبة للجميع 🥰