البداية نبدأ بالصلاة على سيدنا محمد خير الخلق وأشرف المرسلين 🙏 بنضّف الفروج و بنقعوا بماء و خل و ملح نص ساعة و برجع بغسلو و بحطّو بطنجرة على النار مع حوالي 8 كبّايات من الماء و بضفلو المطيّبات اللي ذكرتها سابقاً لغاية الإستواء و تقريباً بيحتاج ساعة من بعد غليان الماء بكون جاهز بصفيه من الماء و بتخلّص من الجلدة الخارجيّة و بنتّف الفخد لقطع كبيرة عقد مابقدر و برشلهم رشة بهار خفيفة و بغطيهم لبعدين بستخدمهم

بجهّز المكسرات اللوز والكاجو كلٌ على حدى اللوز بغليه بالماء لمدة 8 دقائق ليسهل تقشيره و بفسخ الحبة بالمنتصف و لاحظت كتير من الطبّاخين مع احترامي لمهاراتهم بالطبخ عندهم مشكلة حرق المكسرات بشكل جزئي لهيك منقلي اللوز بالسمن و بمقلاة حصراً تكون من الأسفل طبقة معدن سميك لضمان توزيع الحرارة على الكل و نار متوسطة مع التقليب المستمر ومنرفعهم من المقلاة قبل مرحلة الإستواء بدقيقتين

و كذلك نقلي الكاجو فقط بدون سلق بالماء لحتى نحصل عالنتيجة التالية

منقّي الفريكة من الأوساخ اللي فيها و هاد الشي بيعتمد على نوعيتها و اللي استخدمتها مافيها أبداً أوساخ من ماركة (الدرّة) ونوعيتها كتير نضيفة حتى غسل مااحتاجت اغسلها لحتى ماتفقد نكهتها ومننقع الرز بماء ساخن وملعقة ملح لمدة ساعة و منتخلّص من النشاء اللي فيه و منصفيه من الماء

هلّق بدنا نفلفل الفريكة و منبلّش فيها لإنها بتحتاج ضعف الوقت عن الرز فمنحط ملعقة سمنة بالطنجرة و منسكب فوقها الفريكة و منضل عم نقلبها و نحمصها على نار متوسطة لحتى نسمع صوت الحبّات بلشت تفرقع متل البوشار منسكب فوقها لكل كاسة فريكة كاستين من مرق الفرّوج و منتركها على نار تحت المتوسطة مع التحريك المستمر كل 3دقائق

فلفلة الرز منضيف للطنجرة كاسة و نص من مرق الفرّوج تقريباً لكل كاسة رز بدون مانحمّص الرز بالسمن لإني بتتكسر حبّاتو وقت تلزّق بسفل الطنجرة أثناء التقليب و منضفلو نصف ملعقة سمنة و منتركوا على نار متوسطة لحتى تنشف ميتو منغطيه و منضعّف النار تحتو على الأخير و منقلب كل خمس دقائق على ثلاث مراحل و منطفي تحتو و منتركو يتهبّل بالبخار

منرجع للفريكة قبل ماتقرّب ميتها تنشف منغطيها و منضعّف الغاز للأخير تحتها و بدكم تصبروا عليها شوي بتأخذ وقت شي ساعة على النار و حاولوا تتذوقوها كل عشر دقائق لحتى تحسّو الحبة صارت لينة شوي و ماعاد عم تقرط تحت سنانكم بتكون جاهزة و بتتركوها كمان مغطّاية لتتهبّل بالبخار و بعدها مننتقل لمرحلة تقلاية الرز والفريكة بالسمن و دهن الخاروف منضيف ملعقة سمنة بالمقلاية و منسكب فوقها البازيلا مع رشّة سكّر صغيرة و ملح لتحافظ على لونها و منقلبها مدة 3 دقائق و منصفيها على جنب

ومنضيف للمقلاية دهن الخاروف مع السمنة البقيانة و مندوّبهم على النار و منسكب نصف الكميّة فوق الرز و النص التاني فوق الفريكة و منقلبهم بلطف و مننتقل لمرحلة التقديم

التقديم في وعاء زجاجي يكون من الأسفل أضيق من الأعلى و منحط المكسرات بالأسفل منرتبهم لوز و كاجو و فوقهم البازيلا و بعدهم قطع الفروج الكبيرة المحضّرة مسبقاً وبعدهم طبقة رز بسماكة 2سم ووراها طبقة فريكة كمان 2سم و منكرر العملية ذاتها على الرز و الفريكة مرة تانية مع مراعاة كل طبقة تكون مسطحة و بدون تعرجات و منضغط عليهم بملعقة طبخ كبيرة بشكل بسيط ليبقوا متماسكين بعد القلب على الوجه الثاني

في صحن زجاجي كبير و نضعه فوق الوعاء اللّي سكبنا ورتبنا فيه الوصفة و منقلبهم رأساً على عقب بحذر و منسحب الوعاء بلطف و منرش عليهم بقدونس بشكل خفيف و منكفّي الزينة بالمكسرات المتبقية حسب الذوق و صحتين و ألف عافية عليكم و بتمنى كون قدرت وصّل فكرة تحضير الوصفة بشكل مرتّب و يبيّض الوجه لعزايمكم و ادعولنا بالخير و ادعمونا بضغطة لايك لنقدر نستمر و نتشارك أفكارنا سوى ونفيد بعض و نستفيد👌

يقدّم كمان معه اللبن مع رشّة نعناع على الوجه 😍😍😍 شكراً جزيلاً لصبركم و متابعتكم للوصفة ❤❤❤❤❤❤❤