اول اشي منعمل الكريمة عشان بدها وقت لتبرد

منسخن الحليب على النار

منخفق صفار البيض مع السكر و النشا ليصير لونه على بياض

منصير نضيف الحليب الساخن شوي شوي على خليط البيض مع التحريك المستمر و منرجعهم على النار و منضل نحرك فيهم ليصيرو زي المهلبية منطفي النار و منضيف الزبدة و الفانيلا و منحرك فيهم لتدوب الزبدة و تنخلط منيح بالمزيج و بعدين مننقلهم على زبدية و منغلف الوجه بنايلون التغليف و بكون ملاصق للخليط عشان ما ينشف الوجه و يكون قشرة عليه و منحطه بالثلاجة ليبرد

الخطوة الثانية من الكريمة و هاي منقدر نساويها اخر اشي عند التطبيق و هي انه نخفق الكريمة و السكر ليصيرو جامدين و بكون خليط الكاسترد ايلي ساويناه صار بارد و منخلطهم مع بعض شوي شوي ليمتزجو مزبوط

طريقة عمل العجينة

بزبدية منحط البيض و السكر و الزبدة و العسل و منخلطهم على حمام بخار يعني منحط الزبدية فوق طنجرة فيها ماء على الغاز و منضل نحرك فيهم لتدوب الزبدة و بس تدرب الزبدة منضيف الفانيليا و البيكنج صودة و منحركهم لتدوب الصودا شي دقيقة او اقل و منشيلهم عن النار و منضيف الدقيق و منخلطهم لتصير معانا عجينة

بعدين منرش شوية دقيق على الطاولة و منحط العجينة و منعجنها عجن خفيف و منقطعها ٨ كور و منخليهم يرتاحو شي نص ساعة او اقل

منكون مقطعين ٨ أوراق زبدة عشان نفرد عليهم العجينة

منحط كل كرة على ورق الزبدة و ومنفردها لتصير رقيقة و منجيب زبدية كبيرة او قالب التشيز كيك بأخذ الدائرة ايلي حول القالب و بضغط فيها على العجينة عشان تعطينا دوائر متساوية و بترك الأطراف ايلي بزيدو من العجينة عشان اخبزهم و اطحنهم بعدين

بالشوكة بصير اغرزها بالعجينة عشان ما تنتفخ

بس نخلص كل الشوي بخليهم ليبردو هم و الأطراف

بأخذ الأطراف و بطحنهم ليصيرو ناعمين

التطبيق :

بأخذ اول طبقة و بحط عليها كريمة و بوزعها على الطبقة الاولى و بحط الطبقة الثانية و هيك لما نخلص كل الطبقات و بحط على اخر طبقة كمان و على الجوانب و بعدين برش كل الكيك ايلي طحناه على الوجه و الجوانب و بدخل الكيكة على الثلاجة لتاني يوم و هيك بكون شكلها بس تخلص

ملاحظة: هاي اضافة اختيارية للي بحب يطحن جوز مع أطراف الكيك كمان بتعطي طعم طيب بس هاي اختياري كمان ايلي ما بحب يضيف الكريمة مع الكاسترد كمان بصير يعني بيرجع لزوقكم بس انا كتبتها زي ما ساويتها