وفي طاسة نقطع العيش بالشكل ده كدة ونضع عليه زيت او سمنة او زبدة حسب الرغبة و نحمص العيش وبعد كدة نرش عليه كمون وفلف اسود وملح وفصين ثوم مفرومين وياخدو تقليبة مع مراعاة عدم حرق العيش و بعد كدة هنطشه بشوية خل صغيرين وشوية شوربة صغيرين علشان العيش ميعجنش ويأخذ تقليبة كدة بردو ونقفل عليه النار ونغطي عليه علشان يطرى شوية.. واحلى حاجة فيه يكون لسة فيه قرمشة بسيطة

ونجيب قدر اخر ونضع فيه الزيت والارز ونفضل نقلب فيه لحد ما ينشف من الماء خالص وبعد كدة نحط عليه ٢ كوب من الشوربة المغلية والملح ونغطي الرز واول ما يتشرب بعد نخفف عليه النار خااالص لحين السواء

ونجيب باقي الثوم ونفرمه ونضعه في طاسة على النار مع زيت ونقلب لحد ما يبتدي يصفر نطشه بالخل مع رشة ملحة وكمون وتأخذ غلوة ونطفي.. ودي هتبقى الدقة اللي هنوزعها على وجه الفتة وكدة تبقى كل حاجة جهزت

نجيب بقى صينية او طبق التقديم.. بالنسبالي زوجي بيحب ياكلها في الصينية كدة والعيش تحت الارز وفيه ناس بتحب تقدمها في طبق والعيش على الوجه كلوها زي ما تحبوا.. انا رصيت العيش في الصينية وعليه الارز ورشيت عليه دقة الخل والثوم و صلصة الطماطم وجنبها طبق الكوارع بالشوربة والف هنا

ملحوظة : لو حابين تحمروا الكوارع في الفرن يبقى لما تتسلق طلعوها من الشوربة وادهنوها بشوية صلصة طماطم من اللي عملناها وحطيها في الفرن لحد ماتحمر.. بتبقى حلوة بردو بس مشكلة الكوارع انها بتنشف بسرعة لما تكون لوحدها من غير شوربة.. جربوا وشوفوا تحبو تاكلوها ازاي اصل الاكل ده مزااااااج 😋😋😁😁