بسم الله : اولا نجيب البلاطوا تاعي نحط فيه كمية تاع السميد تحت النصف شوية لانوا كل وحدة عندها حجم مختلف للبلاطوا تاعها نحكم هذاك السميد نقسموا على ثلات كيلات و نكيل السمن قيس كيلة دايبة بطبيعة الحال نضيف الملح و السمن للسميد نبسسوا مليح و نبقى نحك فيه بيديا مليح نخليه شوية و نرجع ليه نزيدلوا البيضة و الفرينة و الكيس تاع الخميرة و نبل بالماء و ماء الزهر ندير العجينة طرية شوية لانها ممبعد رايحة تنشف نغطيه و نخليه يرتاح انا خليتوا ليلة كاملة اقل شي 4 ساعات.

نرجع للغرس الي كنت نقيتها و زدتلها ماء الزهر و ملعقة كبيرة مارغرين طرية و عجنتها مليح حتى ولات طرية زدتلها نصف كيلوا كاوكاو محمص و مطحون و حوالي نصف كأس جلجلانية محمصة نقسمها الى اربع اجزاء و نسبط كل جزء على شكل مربع على كيس بلاستيكيي او ورق الزبدة و نحاول نسبط كل جزء قد ربع لبلاطوا انا استعملت الحيلة هذي لانوا لبلاطوا تاعي كبير والي لبلاطوا تاعها صغير تقدر تسبط الغرس على ضربة و بحركة خفيفة نقلب الغرس على لعجينة تاعي و نحاول مانلسقش الغرس للأطراف نخلي حوالي 1سم.

نكمل باقي الأجزاء بنفس الطرية حتى نكمل كمية الغرس نسوسها مليح و نزيد نحكم القسم الثاني من العجينة و نديلها كيما الأولى نتفتفها فوق الغرس نغطيها بشكل متساوي نسوي الوجه بيدي ولا بكوباط و مبعد نولي نملس الوجه بملعقة أكل حتى نتحصل على وجه املس ومافيهش تشققات.

هنا نبدا نطراسي الحبات تاعي انا استعنت بالطابع تاع المقروض العادي نطراسي كل الوجه نحاول ندير حبات مش كبار بزاف و مبعد نبدا نقسم و نوصل السكين حتى للقاعدة تاع البلاطوا كي نكمل نبدا ننقش فالحبات تاع المقروض تاعي هنا النقش كل وحدة تنقش كيما تحب.

نكمل النقش نرشق الحبات تاع المقوض بالكاوكاو نشعل الفرن على أعلى درجة نسخنوا مليح حوالي ربع ساعة ومبعد نقص ل 180 درجة وندخل المقروض يطيب نحطوا فالرف ماقبل الأخير باه يطيب من تحت براحتوا كي نشوف الاطراف حماروا نهبطوا لتحت ونشعلوا من فوق ياخد اللون الدهبي نحيه و نسقيه وهو سخون بلعسل هنا لعسل حسب البلاطوا انا دالي علبة تاع كيلوا و انتوما اسقيوه مليح لأنوا يشرب لدرجة كبيرة نخليه يشرب براحوا ليلة كاملة حتى ينشف نقسموا و نحط الحبات فلي كيسات. من المستحسن كان كمية كبيرة نحتفظ. وبالصحة والعافية.