المسقعة اليونانية (Greek Moussaka)
إفتح في تطبيق كوكبادالخطوات
- 1
هننقشر البطاطس ونغسلها ونغسل الباذنجان ونقطعهم شرائح دائرية ونرش عليهم رشة ملح ونسيبهم شوية عشان يطلعوا المياه اللي فيهم.
- 2
في طاسة على النار هضيف زيت وانزل فيه بشرائح البطاطس الأول بعدين الباذنجان لحد ما ياخدوا لون دهبي جميل كده واطلعهم على مناديل مطبخ وأنشفهم من الزيت اللي فيهم كويس كده خلصنا أول طبقتين نعمل الطبقة الثالثة.
- 3
في طاسة تيفال هضيف اللحمة المفرومة وأقلبها لحد ما لونها يتغير انزل عليها بالبصل وافضل أقلب واضيف كل البهارات بعدين اضيف صلصلة الطماطم وأسيبها تتسبك لحد ما تستوي.
- 4
في حلة على النار هسخن معلقة السمن وانزل عليها بمعلقة الدقيق وافضل اقلب بالمضرب السلك عشان الدقيق ما يعملش كتل مني لحد ما الدقيق ياخد لون دهبي.
- 5
معلقتين الدقيق التانيين هقلبهم على لتر الحليب وأنزل بيهم على معلقة الدقيق والسمن واقلب بسرعة بالمضرب السلك لحد ما يغلي اضيف كريمة الطبخ والملح والفلفل وأهدي عليه النار شوية واسيبه لحد ما يوصل لقوام البشاميل.
- 6
أول لما البشاميل يخلص هاخد منه مغرفتين وأضيفهم على خليط اللحمة المفرومة بالصلصلة وأقلب عشان بتتماسك أكتر وبتبقى نكهتها حلوة أوي.
- 7
ملحوظة : طريقة عصاج اللحمة اني اضيف اللحمة الأول بعدين البصل بتبقى أحسن من اني احمر البصل في زيت الأول كده بتكون أخف بكتير واللحمة ما بتكشش كذلك البشاميل بضيف معلقة دقيق واحدة واقلب ال2 التانيين في الحليب عشان لو ضيفتهم كلهم هضطر اضيف زيهم سمن وكده الوصفة هتبقى تقيلة اوي مع البطاطس والبانجان المقليين.
- 8
كده ال4 طبقات عندنا جاهزين هنمسح الصينية بمسحة زيت ونرص شرائح البطاطس وعليهم رشة ملح بعدين طبقة شرائح الباذنجان وعليهم رشة ملح كمان.
- 9
بعد كده هنضيف اللحمة المفرومة ونساويها كويس عشان تغطي الباذنجان كله وآخر حاجة نغطي الصينية بالبشاميل وندخلها الفرن.
- 10
بتاخد في الفرن ساعة إلا ربع وبفتح عليها الشواية من فوق 5 دقايق كمان عشان وش البشاميل ياخد لون.
- 11
مع أني ماليش في المسقعة ولا الباذنجان عموماً أوي بس حبيت الوصفة دي أوي ميكس المكونات مع بعض مع البشاميل طعمه حلو جداً بالهنا❤️❤️
الكوكسناب
وصفات مشابهة
وصفات ننصحك بمشاهدتها
التعليقات (10)
صباحك ورد🌸🌸🌺🌺