#النمليه

المخصوص (الشوريك _فريسكا صعيدي)
كل دي اسماء للوصفه بتختلف باختلاف محافظات الصعيد
هي وصفه سهله جدا و حلوه و بتتاخد مع كوبايه الشاى في الفطار أو العشاء و محببه للكبار و الصغار و دي وصفه مرات خالي حبيبتي من قلب اسوان ⁦❤️⁩

٣كوب دقيق
نص كوب سكر
نص كوب زيت
٢بيضه
رشه ملح
لبن للعجن
معلقه كبيره خميره
فانليا
معلقه صغيره بيكنج بودر
للوش بيضه و فانليا و معلقه لبن و سمسم و سكر

نحط كل المقادير مع بعض و نعجن باللبن شويه شويه لحد ماتكون عجينه طريه و ناعمه و مش بتلزق في اليد
نغطيها و نسيبها تخمر نص ساعه
و بعد كده نقسمها كور قد بعض بالحجم اللي تحبوه
و نفرد الكوره بالطول في حجم البقسماطه و نلفها علي بعض زي الشكل اللي في الصوره
و نسيبها نص ساعه تخمر تاني و ندهن الوش بالبيض و اللبن و فانليا و( قرفه اختياري) و نحط رشه سكر او نرش سمسم
ندخلها الفرن علي درجه حراره ١٨٠
لما يخرج من الفرن نغطيها بفوطه علشان ماينشفش و يفضل طري