#GA4
#week2 #Fenugreek मेथी

जगण्यापुरता खाणाऱ्यांनी भले आपल्याला जगाबद्दल कितीही ज्ञान दिले असेल, पण खाण्यासाठी जगणाऱ्यांनी हे जग खऱ्या अर्थाने सुंदर बनवले आहे! जगण्यापुरता खाऊन ज्ञानार्जन करणाऱ्या योगी, तपस्वी, विचारवंत, ज्ञानी माणसांनी आग, वाफ, पेट्रोलियम गॅस, सौर उर्जा, शेती यात जे संशोधन केले ते खवय्यांनी आपल्या खवय्येगिरीने सार्थकी लावले आहे. एक पुस्तक वाचण्यामुळे जितके ज्ञान मिळते त्यापेक्षा अधिक ज्ञान एक किलोमीटर चालण्याने मिळते अशी एक प्राचीन म्हण आहे. त्या एका किलोमीटरमधे जास्तीत जास्त ज्ञान मिळवायचे असल्यास बाजारातून अथवा खाऊगल्लीतून चालायला हवे हे खवय्यांनी सिद्ध केले आहे.

अस्सल खवय्ये अन्नाच्या बाबतीत व्हेज नॉनव्हेज असे भेदाभेद मानत नाहीत. दोघांवर त्यांचा एकसारखाच जीव असतो. या प्रेमातून आजवर काही अफलातून कॉम्बिनेशनस् जन्माला आली आहेत. जसे की मेथी आणि सुके बोंबील. बोंबील हा आमच्या परिसरातील सेलिब्रिटी मासा, गरिबांपासून श्रीमंतांपर्यंत सगळेच त्याचे फॅन. पावसाचे अडीच तीन महिने वगळता वर्षभर ते मिळतात. त्या अडीच तीन महिन्यांचा विरह त्याच्या फॅनस् ना सहन होत नाही. म्हणून खवय्यांना बोंबील सुकवून ठेवण्याचा शोध लावला. 'Make hay while Sunshine' यापेक्षा 'Dry bombil before rain comes' हे जास्त लागू होते. या सुक्या बोंबलासोबत ओल्या हिरव्यागार मेथीच्या भाजीचे कॉम्बिनेशन हा आम्हा वाडवळांचा एक अफलातून शोध आहे. पौष्टिक आणि औषधी गुणांनी युक्त मेथी या बोंबलाची लज्जत कैक पटींनी वाढवते. लवकरच हि भाजी मोठ्या रेस्टॉरंटच्या मेन्यू मधे दिसल्यास आश्चर्य वाटू नये.. :)