पॅनमधे पाच वाट्या पाणी घालून त्यात एक चमचा साजूक तुप आणि चिमुटभर मीठ घातले. पाणी उकळल्यावर पाच वाट्या भरुन तांदळाचे पीठ घालून चांगले मिक्स करून झाकून दोन मिनिटे वाफ काढून मग गॅस बंद करावा. आणि पीठ गरम असतानाच मळून घ्यावे. यामुळे पीठ छान मळले जाते. पीठ खूप गरम असल्यामुळे वाटीला बाहेरुन तुप लावून त्याने चेपून मग हाताला तेल लावून पीठ मळून घ्यावे.

कढई मधे तुप घालून त्यावर पांढरे शुभ्र ओलं खोबरं आणि बारीक चिरलेला गुळ घालून मिक्स करावा‌. या मिश्रणाला गुळामुळे थोडे पाणी सुटते, ते आटवण्यासाठी मध्यम आचेवर सतत ढवळत राहावे, म्हणजे गुळ खोबर्याचे सारण करपत नाही. वेलचीपूड घालावी. आणि कढईच्या साइडला मिश्रण सुकायला लागल्याचे दिसले की मोदकाचे सारण तयार आहे असे समजावे.

मोदक बनवताना परत एकदा मोदकाचे पीठ चांगले मळून घ्यावे. मग हाताला तुप लावून मोदकाच्या पारीला कळ्या पाडून मोदक बनवावे किंवा मोदकाच्या साच्यात घालून पण मोदक बनवतात. साच्याला आतुन तुप लावून साचा बंद करुन पीठाचा लहान गोळा साच्यात घालून सगळ्या बाजूंनी पसरवून मग त्यात खोबर्याचे सारण भरावे पिठाने बंद करावे.

नंतर साचा सोडवून त्यातून अलगद मोदक काढावा.

मोदक पात्राला आतल्या बाजूला तुप लावून त्यावर बनवलेले मोदक ठेवून १२ मिनिटे उकडून घ्यावे. मोदक पात्राला तुप किंवा तेल लावावे म्हणजे मोदक पात्राला आतून मोदक चिकटत नाहीत.