पावसाळ्यात मिळणाऱ्या रानभाज्या आवर्जून खाव्यात भरपूर औषधीयुक्त असतात. अशीच एक रानभाजी मी आज केली आहे तीच नाव आहे फोडशी. ही भाजी पावसाळ्यातच आदिवासी बायका विकायला येतात. ही फोडशीची भाजी कांद्याच्या पातीच्या भाजीप्रमाणे सुद्धा करतात, पीठ पेरून करतात, भिजवलेली चणाडाळ किंवा मुगडाळ घालून करतात. पालेभाजीप्रमाणे सुद्धा करतात. खरंतर ही भाजी मी पहिल्यांदाच आणली. रानभाज्यांच्या रेसिपी एवढ्या पाहायला मिळतात की मलाही उत्सुकता होती या भाज्यांची चव चाखायची. या फोडशीच्या भाजीत खूप माती असते त्यामुळे तो ५-६ वेळा तरी पाण्याखाली धरू धुवावी लागते, त्यांचा खाली जो सफेद मुलासारखा भाग असतो तो कापून टाकायचा तसेच पानाच्या मध्ये जर दांडी असेल तर तीसुद्धा काढून टाकावी. खरंच ही फोडशीची भाजी इतकी चविष्ट झाली की सुरुवातीला लेकीची धुसपुस चालली होती की मम्मी ही भाजी कशी लागते माहीत नाही मग तू आणलीस कश्याला म्हणून.... आणि खाऊन बघितल्याबरोबर तिची जी प्रतिक्रिया होती ती पाहूनच खूप छान वाटले.... फोटो काढेपर्यंत भाजी पोटात पण गेली मग लक्षात आलं फोटोच काढला नाही मग आमच्या ताटातलीच भाजी डिशमध्ये काढून फोटो काढला. चला तर आपण रेसिपीकडे वळु या.......