हरभरा डाळ स्वच्छ निवडून, धुवून नंतर चार तास भिजवावी.म्हणजे पुरण छान शिजते.नंतर कुकरमध्ये कटाच्या आमटीसाठी जेवढा कट हवा आहे त्याप्रमाणात पाणी घालावे.व डाळ शिजवून घ्यावी.

मध्यम गँसवर कुकर ठेवावा.साधारण अर्ध्या तासामध्ये पुरण शिजते.कुकर थंड झाल्यावर रोळीवर डाळ उपसून त्यातील पाणी (कट)पातेल्यात निथळू द्यावे.
जेवढी डाळ...तेवढाच गूळ असे प्रमाण घ्यावे.

गँसवर कढई तापत ठेवावी. त्यात निथळलेली डाळ व गूळ घालून मिश्रण चटका देण्यास ठेवावे.गूळ पूर्ण विरघळू लागतो.सतत पुरण हलवत रहावे.आणि शिजणाऱ्या पुरणाच्या कडा उलथण्याने सतत काढाव्यात. वरील प्रमाणाच्या पुरणास चटका देण्यास अर्धा तास लागतो.मिश्रण हळूहळू घट्ट होऊ लागते.उलथणे पुरणात घट्ट उभे राहिले म्हणजे पुरण झाले असे समजावे.यावर किसलेले जायफळ व वेलचीपूड घालावी.

शिजलेले पुरण,गरम असतानाच पुरणयंत्रातून बारीक जाळीने गाळून घ्यावे.

पुऱ्यांना भिजवतो तशी घट्ट कणिक भिजवून तासभर भिजू द्यावी.पुरी एवढीच गोळी लाटावी.त्यात छोटासा पुरणाचा गोळा घालावा. व समोरासमोरच्या बाजू दुमडाव्यात.असे सर्व दिंड तयार करावेत.मोदकपात्रात किंवा चाळणीवर किंवा इडलीपात्रात १०मिनिटे दिंड उकडून घ्यावेत.
काढताना यावर थोड्या गार पाण्याची धार सगळीकडून सोडावी.म्हणजे दिंड चटकन सुटतात.चिकटत नाहीत.

देवाला नैवेद्य दाखवून गरमागरम दिंड साजूक तूप घालून वाढावेत.