#रानभाज्या
पावसाळ्यात अगदी रानभाज्यांची रेलचेल असते. अशीच एक औषधी गुणधर्म असणारी रानभाजी मी तुम्हाला दाखवणार आहे. कुर्डु नाव असलेली ही रानभाजी मुतखडा, मधुमेह, रक्तदाब, बद्धकोष्ठता, जुनाट खोकला, कफविकार, मासिक पाळीचा त्रास यावर खूप औषधी आहे. या भाजीची पाने हार्टच्या आकाराची असून पानांच्या कडा व देठ हे लालसर दिसतात. याची पाने व पुढचा कोवळा भाग खुडून ४-५ वेळा पाण्याने स्वच्छ धुवून घ्यायची. ही भाजी जास्त वाढून जून झाली की त्याला सफेद रंगाच्या तुऱ्यासारखी फुले येतात जी आपण दसऱ्याला तोरणात वापरतो. काही ठिकाणी या फुलांना कोंबडा म्हणतात व भाजीला कुरडई असेही संबोधतात. ही भाजी फक्त पावसाळ्यातच उगवते त्यामुळे इतरवेळेला मिळत नाही तेव्हा याच्या फुलांमध्ये एकदम छोट्या काळ्या रंगाच्या बिया असतात तुळशीच्या बियासारख्या त्यांचं चूर्ण करून पाण्यातून घ्यायचं. तसेच ही भाजी अतिप्रमाणात खाल्ल्याने जुलाब होतात त्यामुळे प्रमाणातच खावी.