सर्वप्रथम सर्व साहित्याची तयारी करावी. अर्धी वाटी तुरीची डाळ चांगली धुवून पाणी घालून कुकरमध्ये ठेवून चार ते पाच शिट्या देऊन चांगली शिजवून घ्यावी. त्याचबरोबर कांदा आणि टोमॅटो बारीक करून ठेवावा. डाळ शिजल्यावर एकीकडे कढईमध्ये तेल घालून गरम करावे.

त्यानंतर मोहरी- जीरे घालून फोडणी द्यावी. कढीपत्ता घालावा. त्यानंतर कांदा घालावा थोडा परतून घ्यावा त्यामध्ये हळद अणि हिंग घालावे आणि चांगले परतून घ्यावे. कांदा थोडा लालसर झाला पाहिजे त्यानंतर लगेचच टोमॅटो घालावा आणि चांगला परतून घ्यावा. त्यानंतर लाल तिखट घालावे आणि परतून घ्यावे.

आता आपली शिजवलेली डाळ चांगली घोटून कढई मध्ये घालावी आणि चांगले मिक्स करावे. 1 - 1/2 वाटी पाणी घालावे. आता त्यामध्ये गरम मसाला आणि मीठ घालावे आणि उकळी येऊ द्यावी. उकळी आल्यानंतर गॅस बारीक करावा.

आता बाजूला गॅसवर छोटे कढल ठेवावे आणि त्यामध्ये तूप घालावे. गॅस बारीक ठेवावा म्हणजे आपली तडका जळणार नाह. आता तूप गरम झाल्यावर त्यामध्ये जीरे घालावे. जीरे तडतडल्यानंतर हिंग घालावे आणि लसूणही घालावा. लसुण थोडासा लाल होत आला की लगेचच लाल मिरचीचे तुकडे घालावे आणि लाल मिरची पावडर ही घालावी. आता लगेचच गॅस बंद करावा.

आता आपला तडका तयार झाला आहे लगेच शिजवलेल्या डाळी मध्ये घालावा. त्यानंतर कोथिंबीरही घालावी आणि मिक्स करावे. आता आपली तडका दिलेली डाळ फ्राय तयार झाली आहे.