اولا نجيبوا رسيبيوا ولا ليانة ونحطوا فيها السميد وجميع المقادير والمرغرين ونبسوها مليح بين يدينا ومنبعد نحطوا عليها الماء وماء الزهر ونخلطوا غير بصباعنا ونغطيوها ونخليوها تتشرب حتى نخدموا الغرس

ثنايا نجيبوا الغرس ونڨيوه مليح من العلف ونعجنوه بالمرغرين وماء زهر حتى يولي طري وكي نخدموا الغرس نجيبوا العجينة ونقسموا على زوج نحلوا وحدة على بلاستيك غذائي ونحطوا فوڨها الغرس ونزيدوا نحطوا فوقه العجينة الثانية ونحلوخا حوالى 5ملمتر ونطبعوها بمول تاع لمبرجة ونسڨمواها لحواشي يكون طاجين سخن على نار قليلة

وفي الاخير بعدما نوجدوها نطيبوها على نار قليلة حتى تتحمر وطيب بصحتكم