بنجيب الفراخ و نقطعها و نعمل فيها شقوق بالسكينه و مهم جدا الشقوق.

نخلط كل البهارات فى الكبه او خلاط ما عدا البيكينج باودر ثم نحطهم على الدقيق (الدقيق بنحط عليه البيكينج باودر) و لازم البيكينج باودر لا يكون كتير عشان القرمشه ماتتكسرش ولا قليل عشان ما تبقاش متبططه.. لازم يكون مظبوط و يغضل لو تعايروه بمعلقة المعايير.

نأخذحوالى 3 ملاعق كبار من الدقيق المخلوط او اكتر ثم ندوبهم فى حوالى ثلث كوب ماء ازيد او اقل المهم حتى يصبح سمكه مثل سمك الطحينه.. يعنى يكون سمكه تقيل شوية و مش تقيل قوى ولا خفيف.

.بعد كده بنجيب حتة الفراخ حته حته و نحطها فى الخلطه اللى بالماء ثم الجزء الناشف و مانضغطش عليها او نقعد نحرك فيها عشان تعمل القرمشه صح، بتبقى حته واحده نمسك منها و نخليها كلها متغطيه دقيق و ممكن نهزها هزه خفيفه عشان ننزل الزايد م الدقيق و بعد كده نحطها فى الزيت.

.كمان اما نخلطها نحطها على طول فى الزيت السخن ما نستناش اما نعملهم كلهم و بعدين نحط واحده واحده فى الزيت ، كل دا عشان تتطلع مقرمشه و جميله زى بتاعة بره.

الدقيق الناشف اللى بنحط فيه الفراغ بعد التتبيله السايله اما يتعمل فيه كلاكيع ممكن نحط عليه ميه و نستخدمه تانى لباقى الحتت بدل ما يترمى.

النار مش لازم تفضل عاليه على طول ممكن تبقى عاليه و تهدى عليها و بعد كده لو هديت قوى تعلى عليها تانى ، اهم حاجه الفراخ تستوى و تعمل القرمشه من بره و من جوه تتاكدى انها استويت.. ممكن تتطلعى واحده و تحاولى تشوفيها بشوكه او بسكينه.

جميله جدا لو مشيتوا بالحرف عشان تبقى مظبوطه كده و اهم حاجه تظبوطوا البيكينج بودر ياريت بمعلقة المعايير.. الصوره اللى فى الوصفه دى من عاميلى انا 🤗.. ممكن تقدموها مع بطاطس محمره و كاتشب و مايونيز و ممكن تعملوها مع رز بالكارى و تومية زى مانا عملتها.

و لو عايزنها تبقى سبايسى ممكن تجيبوا سرنجة و حطوا فيها الصلصة الحاره و احقنوا القطع بيها هتلاقوها تتطلع اسبايسى زى بتاعة كنتاكى.. و بالهنا و الشفا 🤗