هلأ منبلش نطبق العجينة مناخد مقدار كرة بحجم اليد من العجينة ومندعكا شوي بايدنا وبعدين منمدا بالشوبك وبعدين منرش شوية سمسم على جنب تاني ومنشيل العجينة يلي مديناها ومنحطا فوق السمسم بهالطريقة متل بالصورة

هلأ مناخد كرة من عجينة التمر أصغر بشوي من كرة العجين ومندعكا ومنمدا شوي بالشوبك لازم ندهن السطح بزيت قبل مانمد عليه التمر حتى مايلزق وبعدين منشيلا منحطا فوق العجينة منزبطا بحيث تغطي كل العجينة تقريباً

هلأ منبدأ بلف العجينة متل الرول بهالشكل ومنضل عمندحرج الرول لحتى يصير رول بسماكة معقولة مايكون كتير عريض

أنا ضليت دحرج الرول لحتى صار بهالعرض هاد

بعدا منبلش تقطيع الرول قطع صغيرة بهالشكل هاد ومنعمل ضغطة صغيرة بالسكين بنص كل قطعة متل مو شايفين

هلأ منشيل القطع منصفن بالبايركس أو بصينية الفرن ومنخبزن على حرارة متوسطة من فوق وتحت منشغل شي عشر دقايق أو ربع ساعة منضل جنب الفرن منستفقدن حتى مايحمرو كتير

منطالعن مننتظر شي خمس دقايق ليبردو شوي مامنلقن حتى مايفرطو بعدين منشيلن منفردن بصينية تانية ليبردو تماماً وبعدا منعبيهن بعلب ومنطالع منن وقت الى بدنا منقدمن مع القهوة كتيييير طيبين بشهو وصحتين وهنا على قلبكم