البارحة من ضيقة الصدر سهران
من سبت الهوجاس فالصدر ضيقه
فتحت لي بيبان واغفلت بيبان
بين أغراب البين وسمع نعيقها
المشكلة ماهيب صد وهجران
المشكلة يومي عرفت الحقيقه
حقيقة اللي كان له قدرن وشان
اللي مواثيقه بصدري عميقة
ما كنت أصدق فيه من كاينن
كان شخصن اعزه دون كل الخليقه
ما قيل فيه اقول زورن وبهتان
كلفت نفسي فوق مالا تطيقه
لكن بعد ما شفت أنا شوف الاعيان
هانت علي ذيك العهود الوثيقه
خلاص بعد اليوم في ناظري هان
لا صار ما يحفظ عهودي طريقة
يا شينها لا طاح من عينك إنسان
ياشين نكران الصديق لصديقه
ياشين لامن صرت واثق وغلطان
ياشين طعنات القلوب الرقيقة
من يامن الدنيا على طول الازمان
لا بد عسرات الليالي تعيقه
رحلتك في الدنيا مدينن وديان
لا حان دينك ممهلك لو دقيقه
هذا كلام التجربه خير برهان
من وافين ذاق الغدر من رفيقه
ماهو صحيح ان قال ماهوب ندمان
إلا الندم ولع بقلبه حريقه
عن واقع عاشه وعن خافين
بان أصبح سرابن منه مابل ريقه
حتى لو انه جامل الناس بلسان
أصبح مع الهوجاس كنه شقيقه
يمكن مع الايام يسلى بنسيان
مير البلاء نقض الجروح العتيقه
