نضع في وعاء مكونات العجينة ما عدا الخميرة و الفرينة و نضربهم بالباتور مليح حتى نتحصل على كريمة بيضاء من بعد نبدأ نزيد في الفرينة مغربلة مع الخميرة حتى نتحصل على عجينة متماسكة نغلفها بكيس غذائيّ و نحطها في المجمد 15د نجبدها و نحلها بالحلال فوق طاولة عمل مرشوشة بالفرينة و نحلها سمك متوسط شوية نحطها في قالب كبير او قوالب التارتولات و نثقب العجينة بالفرشيطة و نحطها في المجمد 15د من بعد ندخلها للفرن في الرف المتوسط على درجة الحرارة 180* حتى تأخذ اللون الذهبي من جميع الاتجاهات

للكريمة: في كاسرونة نضع الحليب. بيضة. النشاء. السكر نخلط بارد في بارد و نحطها فوق النار مع التحريك المستمر حتى تعقد نزيد الفاني و نفرغها في وعاء و نغطيها و نحطها في المجمد حتى تبرد تماما من جهة أخرى في وعاء نحط بودرة الشونتي و الحليب و نضربهم بالباتور مليح حتى نتحصل على كريمة ثقيلة و نبدأ نزيد في الكريمة الاولى بالتدريج من التحريك بالباتور حتى تولي كريمة بيضاء

الناباج: نحط الفلون و الماء و السكر في كاسرونة نخلط مليح و نحطها فوق النار حتى يعقد الخليط و نخليه يبرد

بعدما طابت العجينة نخلاها تبرد مليح و نعمرها بالكريمة و نزينها بالموز مقطع و نفرغ الناباج و نزين بأوراق النعناع و نحطها في الثلاجة تبرد مليح و نقدمها مع عصير بالصحة والعافية