بتجيبي الباذنجان الصغير المدور وبتقشريه كلو بس ممكن تخلي فيه زيوحة قشر وبتشقيها من النص نص فتحه مش كتير وبتغسليهن وبترشي بعد غسيلن ملح ورشة كمون وكمان رشة كزبره ناشفه وبتتركيهن لينشفو ويتشرب الملح والباقي

بهالوقت بتجهزي اللحمه المفرومة متل العاده بتقلي بصله لحتى تتحمر شوي وبعدين بتحطي اللحمه المفرومه عليها وبتقليها لحتى تستوي وبتشيليها على جنب بس تستوي

بتقلي الباذنجان يعني تشويح لحتى يكون لونن بني بس مش محروق يعني ذهبي وبعدين بتشيليهن من على النار

بعدين بتحشي هالباذنجانات باللحمه المفرومه بالشق اللي عملتي بشكل عرضي للباذنجانه بس ما بتحشيهن كتير مشان ما تفزر لانو بوقتا بتكون طريه حتى لو زاد عندك لحمه خليهن لانو راح تستعمليهن

بس تخلصي حشي بتحطيهن على جنب بعدين بتجيبي طنجره بتحطي فيها ماي تقريبا كاسة ماي او كاسة ونص وبتحطي الصلصه فيها وبتخليها على النار لحتى تغلي بس بتحطي فيها ملح او مكعب ماجي وبس تغلي بتوطي النار عليها وبتسقطي الباذنجانات وحده وحده بس انتبهي ما تفتح الباذنجانه وهيك بتخليهن فيها لحتى شوي يغلو بالصلصه يعني شغلة ٥ دقايق بس وبطفي النار عليهن

بتحضري صوص اللبن يعني تقريبا ٣ ملاعق طحينة وكاسة لبن وحص توم وماي وبتخلطيهن مع بعض وبتشوفي السماكه ازا كانت سميكه بترخيها بالماي وبترشي ملح كمان

اخر شي الخبز المحمص بتحطيه بالكعب الصينيه اللي بدك تعملي فيها الفته بعدين بتحطي الباذنجانات وحده وحده فوق الخبز والصلصه بديريها عليهن مع الخبزات والباقي من اللحمه المفرومه بترشي على الخبزات كمان وآخر شي بتسكبي خليط اللبن وعلى وشها رشة بقدونس واللوز وآخر شي السمنه على وجها بس بتكوني حميتيها قبل ما تسكبيها على الفته