اولا نبدا بالعجينة نخلط السميد و الفرينة و الملح مليح و نضيفلهم الماء و نلم العجينة فقط مانعجنوش ، نجيبو كيس بلاستيكي نسردوه مليح بالماء من داخل و تنخلقو من الماء الزايد نخليو شويا برك و نحطو العجينة داخل الكيس نغلقو عليها و نخليوها حوالي نصف ساعة و نجبدوها من الساشي و ندخلوها في بعضاها برك مش نعجنو ، و اذا شفتي العجينة يابسة زيديها شويا ماء و دخليها في بعضاها

عاودي سردي الساشي و خلي فيه الماء حوالي ملعقة كبيرة و عاودي حطي العجينة ، هاد المرة خليها اطول مدة تقدري عليها ، فالمدة هادي نقشرو الخضر و نحطوهم يتقلاو مي العادة و كي يطيبو نحطو طماطم العلب نخليوها طيب شويا و نطفيو عليه و نخليوه يبرد

زيدي اجبدي العجين تاعك من الساشي و دخليه في بعضاه مليه ، إدهني بلاطو ولا الڨصعة تاعك بالزيت و لوزي و حطيهم و كي تكملي ادهنيهم من فوق بشويا زيت غطيهم ببلاستيك و خليهم يرتحو

كي يرتحولك مليح اجبدي بالوحدة افتحي حطي الحشو طبقي و طيبي ، انا مع الحشو موالفة نحط جبن اليوم مش متوفر للاسف ، كملي بنفس الطريقة حتى تكملي كامل العجينة