أولا نطيب اللفت والفول الأخضر لوحدهم في الماء والملح

نحضر طماطم حب حسب الكمية أنا استعملت 4 حبات متوسطين نرابي الطماطم أو نرحيها في الروبو

كمية من الثوم من الأحسن إن نهرسه في المهراس مع القليل من الملح وفلفلة خضراء حسب الرغبة

نضع الكل في قدر ونضيف ملعقة زيت وملعقة طماطم مصبرة وشوية راس حانوت وفلفل احمر مرحي والكرافس المقطع رقيق و نضعهم على نار متوسطة حتى يطيبو شوية

نحضر 3 أو 4 ملاعق أكل فرينة (طحين او دقيق) حسب الكمية ونحللهم في الماء البارد ونصبهم فوق خليط الطماطم ونحرك دائما ونمرق بماء ساخن ونتركها على نار هادئة طيب تماما ونضيفولها اللفت والفول.

بالنسبة للعجين نبلو السميد والملح بالماء جيداً ونخليه يرتاح جيداً ثم نعجنوه جيداً بكف اليد كما تاع الشخشوخة

ومن بعد نعملو كريات نستعين بالزيت طبعاً ونغطيه ونخليه يرتاح ثم نطيبو في طاجين الحديد حنا نقولو طاوة نطيبوه فطير فوق بعضو حتى نكملو العجين