استعملت مول القلب (جبت كرطونة وقطعتها على شكل قلب وغلفتها الألمنيوم وخليتها بجيه استعملتها كقاعدة)، طحنت البسكوي بالآلة اليدوية (استعملت بسكوي ديجيستيف بنتو روعة) حطيتو في إناء ضفت عليه الزبدة (مارغرين لابال) المذابة ونخلط حتى نتحصل على خليط رملي. كبيت هاذ الخليط في المول وسويتو مليح ونحاول نضغط عليه بكاس أو ملعقة باش تترسى مليح ويدي شكل القالب دخلتو للثلاجة.
ملاحظة: يمكن إستعمال أي نوع بسكوي متوفر حتى بيمو يجي بيه مليح.

من جهة أخرى نوجد كريمة الجبن فيها زوج مراحل، المرحلة الأولى نحط في إناء الجبن الكريمي (استعملت جبن فيلاديلفيا) مع مربعات كيري والسكر الناعم نضربهم مليح بالباتور حتى يصبح المزيج كريمي ومتماسك، ومن جهة أخرى ضربت كاس الكريمة السائلة (استعملت كريمة هوبلا) حتى أصبحت كثيفة ومتماسكة نضيف لها الفاني بودرة، نخلط المزيجين مع معض حتى تتجانس كل المكونات.
ملاحظة: يمكن استبدال جبن فيلاديلفيا بجبن ريجيم

نصب الخليط فوق طبقة البسكوي نحاول نسقم الوجه ونغطي بفيلم غذائي (بلاستيك غذائي) وندخلها للمجمد مدة 2 ساعة حتى تتماسك جيدا.

نروح نوجد كولي الفراولة نطحن الفراولة والماء ونحطهم في كاسرونة نضيف لها فلان الفراولة غبرة والنشاء والسكر نخلط الكل بارد في بارد نحط الكل فوق النار مع التحريك حتى يغلي الخليط وهاذيك الرغوة اللي يديرها من فوق لازم نحيها نطفي عليه ونصفيه، نخليه شوية يهدأ ونكبّه في مول السلكون على حسب الرغبة وندخلو للمجمد باش من بعد نحطو فوق طبقة الجبن.

عند التقديم نخرج التشيز كيك من المجمد ونزينو من فوق بكولي الفراولة اللي حطيناه في مول السلكون ونخليه شوية يدي حرارة المطبخ ويقدم بألف صحة وهنا.
ملاحظة: إذا ما حبيتيش هاذ طريقة التقديم يمكن تقدميه بالطريقة المعتادة يعني كي توجدي كولي الفراولة بلا ما ديريه في مول السلكون خليه يهدأ ويصبح بحرارة الغرفة ثم صبيه مباشرة فوق التشيز كيك يكون بارد ثاني يجي شكلو شباب ورائع، أنا بغيت نبدل شوية في التقديم.