في وعاء نحط 125 غرام زبدة نضيفلها بيضة و زوج ملاعق سكر و كيس فانيليا ونخلط المكونات جميعا باليد او بالفوي

بعدما تتخلط المكونات نبدأ نضيف في الفرينة و معاها كيس خميرة كيميائية حتى تتلم عندنا عجينة طرية ومتماسكة (عجينة الصابلي)

نشعل الفرن على درجة حرارة متوسطة

نجيب الصينية لي حندير فيها نقدرو نستعملو صينية كبيرة ضربة وحدة ونحطو كامل العجينة وجينا تارت كبيرة او نجيبو قطاعة كيما اي مثل تحبي ونحلو العجينة بسمك رقيق حولي نصف سم و نبدأ نطبع حتى نكمل كامل العجينة

نحطهم كامل فالبلاطو ولازم نخرقهم بفرشيطة ولا موس ملييييح باش كي نحطهم يطيبو ميديروليش انتفاخات وتفسد الشكل نحطهم يطيبو حتى نشوفهم بداو يحمارو على الجوانب نطفي عليهم ونشعل من فوق باش يديو لون ذهبي ومبعد نخرجهم من الفرن ملازمش نهزهم وهومت سخونين لانو رايحين يتفتو

في الوقت لي يكونو يطيبو نبداو نحضرو الكريمة

نجيبو كاسرونة نحط فيها زوج ملاعق كبار فرينة و زوج ملاعق كبار نشاء ونخلط مليح بالفووي نضيفلهم نصف كأس سكر عادي ونخلط و نزيد عليهم نصف لتر حليب ونخلط بارد في بارد حتى يتخلطو مليح نشعل النار تكون متوسطة ونحط الكاسرونة ونبقى نخلط نخلط بالفوي منحيش يدي نهائيا لانو حيصراو تكتلات نبقى نحرك حتى يبداو يديرو فالفقاعات و تثقال الكريمة نطفي عليها

نحيها من على النار نضيفلها كيس فانيليا و زوج علب ياغورت اي ذوق تحبيه انا استعملت (fort goût framboise) ذوق توت جا بنييين بالبزاف وتخلطي مليح وتغطي الكريمة وتخليها تبرد

بعدما تبرد و يكون القاطو ايضا برد نحط كمية من الكريمة ندهن بيها السطح تاع كل حبة انا زدت جبت لابوش وركبت فيها لادوي باش ندير وردات بالكريمة

بعدما نكملو وضع الكريمة نزينو بأي فاكهة موجودة فالصيف كنت نستعمل الفراز والبنان يجيو بزاف باهيين ضرك درت غير البنان وجات بنننننة مام نقدرو منديروش فاكهة نهائيا وهكذاك وتجي بززااااف بنينة

نحطوها فالفريجيدار تبرد مليح والكريمة تحكم روحها وشهية طييييبة ❤❤😁😁🍮🍰🧁