بسم الله اللهم صلي وسلم على نبينا محمد اولا في كوكوط نضع طرف الدجاج نقطعلو راس بصل متوسط نضيفلو ملح وقليل من الكركم والكاري والفلفل الاسود نضيف زبدة ونتركهم يتغلاو من بعد نضيف حبة طماطم مقطعة نغلق الكوكوط ونتركهم يستوو من جهة نقطع الباذنجان دوائر والبطاطا والطماطم ونقليهم كل وحدة على حدى

ونغلي في ماء وملح وورقة رند الروز والهيل نترك الروز يستوي من بعد نصفيه ونتركه يقطر نضيفلو التوابل المذكورة وراس بصل مقطت وذابل في زيت وزبدة لما تستوي المرق ننزع الدجاج نفتته ونحتفظ بالمرق في مول يكون عالي او قدر يكونو يديه ماشي بلاستيك انا وضعت ورق الطبخ درت طبقة باذنجان ثم طبقة بطاطا ثم الدجاج ثم الارز وعاودت نفس الشي بالطبقات الاخرين

سكبت المرق لي احتفظنا بيه فوقهم ماشي بزاف مرق لانو كلش طايب غلقت القدر تاعي بورق الطبخ باحكام ودخلتها للفرن

لما نشف كل الارز امتص المرق خرجت القدر من الفرن وتركته نصف ساعة بدون ما نحركه وعند التقديم قلبت القدر على صحن التقديم جاو الطبقات باينين والطبق واش نقلكم ولا اروع بنين بزاف قطعت عليه الكسبر وقدمتو

نعمة دايمة عليا وعليكم خياتي