في قصعة نحط الفرينة والمايزينة والملح والفاني والحليب غبرة نخلط الكل جيدا ونبسسها بالليدام (استعملت سمن المدينة) ونعاود نغربلها (نسيرها) في الغربال يكونو عنيه شوية كبار باش مديرش كتل.
ملاحظة مهمة: الكيلة اللي استعملتها هي غرفية نتاع لحريرة صغيرة

نضيف حبة بيض ونلمها بمزيج من الماء والماء الزهر حتى نتحصل على عجينة ملساء، نقسم العجينة إلى قسمين وكل قسم نقسمو إلى 3 نديرهم في بلاستيك غذائي ونخليها تريح على الأقل 6 ساعات

في هاذ الوقت نحضر الحشو: نجيب القاوقاو نحمصه غير شوية (أنا فاتلي شوية) ونطحنه شوية خشين ونضيفله السكر ولفاني و ملعقة كبيرة سمن وقطرات من عطر اللوز الحلو وقطرات من عطر الجوز نكون حليتهم في شوية ماء الزهر ونبدا نفتل فيه ونرش بالماء الزهر حتى نتحصل على حشو كيما الطعام ما نكثرش ماء الزهر باش الحشو من بعد في الطياب ما يخرجش، نغطيه ببابي فيلم (بلاستيك غذائي) ونخليه يريح بجيه.

بعد ما ارتاحت العجينة نسرح الكرية الأولى بالطول نرشها بالمايزينة ونطويها على زوج ونخليها على جنب ونزيد فوقها كمية من المايزينة، نفتح الكرية الثانية بنفس الطريقة، والثالثة كذلك نحــاول نفتحوهم قد بعضاهم (نرش المايزينة نطوي ونزيد نرش المايزينة ونحطها فوق الثانية والثالثة بنفس الطريقة) بهاذ الكيفية نكونو تحصلنا على 6 طبقات. وبنفس الطريقة نحل الكريات الثلاثة الباقية. نغطيهم ببلاستيك غذائي ونخليهم يرتاحو مدة 10 د

ندهن الصينية بالسمن (قياس الصينية اللي استعملت 35/25) ونورق الجزء الأول (كي نكون نحل في العجين نحل من الداخل للخارج) على قيس الصينية بمساعدة الحلال نرفد العجينة ونحطها فوق الصينية ونسرحها مليح ونخليها زايدة على الأطراف.

ندير الحشو لازم نفتحو بين يدي عاد نحطو فوق لعجينة ونوزعو بشكل متساوي.

ونعاود نحل الجزء الثاني بنفس الطريقة وبمساعدة الحلال نرفد العجينة ونحطها فوق الحشو، نقرص الأطراف جيدا ونحي العجين الزائد.

بمساعدة المسطرة قطعت جزء على شكل مقروطات وببقايا العجين قطعت بمول الكوكياجة حطيتو فوق الحبة ورشقت في الطرف حبة قاوقاو والجزء الآخر قطعتو على شكل مثلثات

ندهن البقلاوة بالسمن ذايب جيدا (بصح بلا ما نعومها)، نسخن الفرن جيدا 20 د قبل وكي ندخل الصينية نقص عليها نخليها على نار أقل من المتوسط باش طيب على خاطرها وتدي وقت في التوراق ومرة على مرة نقلّب الصينية كي طابت من تحت وحمارت في الجوانب شعلت عليها من فوق باش دات لون ذهبي جميل وطفيت عليها، دات معايا ساعة ونصف في الطياب، كي خرجتها من الفرن وهي عاد سخونة فرغت عليها لعسيلة باردة (استعملت المرجان) خليتها تتشرب ليلة كاملة.

الغذ من ذاك عاد قسمتها، تجي مقرمشة وبنينة هاذوك المثلثات زينتهم بالقاوقاو ذوق البيسطاش. وتقدم بألف صحة وهنا.