الحاجة الأولى اللي نبدأ بيها غسلت الروز مليح وخليته يستقطر جيدا (الروز اللي استعملته الروز الأصفر اللي مفور)، في طنجرة الضغط نحط القليل من الزيت و ملعقة صغيرة زبدة نضيف عليهم البصل نقلي مليح ونزيد الروز ونحرك حتى تتلبس كل الحبات بليدام.

نضيف الجزر قطعتو رقيق، نخلط مليح ونضيف الفلفل الأخضر وكل مرة نحرك مليح حتى تتقلى المكونات.

نضيف البطاطا نحرك ونضيف الجلبان، نقلي الكل جيدا وفي الأخير نضيف الطماطم

نحرك مليح ثم نضيف التوابل (الملح، الفلفل الأسود، الكركم، سكين جبير، القصبر ناشف، الكاري، الفلفل الأحمر، الكمون) وورقات رند، ندخل التوابل مليح مع الخضار ونمرق ب 3كيسان ماء دافي (كيلة ونص روز تقابلها 3 كيلات الماء) نخلط مليح نخليه يبدا يغلي عاد نغلق الطنجرة نخليه يطيب على نار متوسطة إلى هادئة، نحسب مدة 10 د من بداية التصفير ونطفي عليها، ونخليها مغلوقة مدة 15 د.

كي تفوت 15 د نفتح عليها، نلقى الروز طايب على حبة وحتى الخضار طايبين.
ملاحظة مهمة: لازم نقطعو الخضار قطع صغيرة باش ما تديش وقت كبير في الطياب.

ويقدم بألف صحة وهنا، أنا رافقته مع كبد الخروف مشوية على الفاخر.