كيما العادة نحضر كل المكونات ونبأ باسم الله، نحط القاطو في كيس ونهرمشو بواسطة الحلال (أنا استعملت ماكسون) في كل كأس حطيت مقدار ملعقة كبيرة نصف من القاطو ستفتو مليح وخليتو على جيه

نروح نوجد كريمة الفراولة في كاسرونة حطيت الحليب وغبرة الكريم باتسيير حلطت بارد في بارد وحطيتها فوق النار حتى بدات تغلي وثقالت شوية قبل ما نطفي ضفت عليها المارغرين (استعملت ماني) خلطت مليح حتى انساجمت المكونات وطفيت.
ملاحظة: 1- بودرة الكريم باتسيير ما ضفت لهاش السكر هي تجي حلوة.
2- اللي يبغي الكريمة تجي شوية ثقيلة ممكن ضيف ملعقة صغيرة مايزينة أنا هاد القوام عجبني.

وهي عاد سخونة نفرغها في إناء ونضيف لها بودرة الشونتيي ونضربها بالباطور (المضرب الكهربائي) هاد بودرة الشونتيي تزيدلها في البنة ويصبح القوام سلس.

نفرغها في الكؤوس وهي عاد حامية بكميات متساوية ونخليها تهدا وندخلها للثلاجة الوقت اللي نحضر فيه الطبة الأخيرة.

في كاسرونة نحط الماء (250 ملل) و علبة الفلان بذوق الفراولة نحطها فوق النار حتى تغلي نخرج الكؤوس من الثلاجة نحط قطع الفراولة من فوق كنت قطعتها دوائر (كانت عندي كمية قليلة) وكبيت عليها الفلان خليته شوية دافي، دخلت الكؤوس للثلاجة باش الفلان يبرد ويشد روحو.

عند التقديم زيتها بورود من كريمة الشانتي (كانت عندي من قبل) وفي وسط الوردة فرغت القليل من صوص الفراولة الجاهز.

وفي الجنب زينت بقطعة صغيرة من الفراولة، جات بزاف بنينة وخفيفة وما شي حلوة بزاف.

وتقدم بألف صحة وهنا.