أول حاجة نبدأ بيها هي تتبلية الدجاج والكفتة، في إنائين منفصلين واحد نحط فيه قطع الدجاج والتتبيلة الخاصة به (الكركم، فلفل أسود، سكين جبير، فلفل أحمر، ثوم غبرة، ملح، م.ص موطارد، عصير نصف حبة ليمون والمعدنوس) والأخر نحط فيه الكفتة مع التتبيلة الخاصة بيها (الكركم، ثوم غبرة، فلفل أسود، ملح، سكين جبير، القليل من الفلفة حمرة، م.ك سميد متوسط، حبة بصلة مرابية،م.ك زيت) ندخل المكونات في بعضاها مليح ونغطي كلى الإنائين بفيلم غذائي وندخلهم للثلاجة لوقت الإستعمال نخليهم مدة ساعة وشحال ما خليناهم كان أحسن

في هاذ الوقت نوجد لعجينة في إناء نحط الفرينة مع الزيت والملح ونلم بالماء دافيء حتى نتحصل على عجينة تكون شوية مرخوفة ورطبة نغطيها ونخليها ترتاح تقريبا 15 دقيقة.

في هاد الوقت نروح نقلي الكفتة نديرها كويرات ونقليها في شوية زيت نكون سخنتو من قبل وفي نفس المقلاة نقلي قطع الدجاج ونخليهم يبردو بجيه

نوجد الصلصة المرافقة في غرفية نحط الموطارد والكيتشوب والمايونيز مع الهريسة لي يحب الحار ملح وفلفل أسود وعصير نصف حبة ليمونة نخلط الكل بالفرشيطة حتى تتجانس المكونات ، نحط كل المكونات اللي نحتاجها ونبدأ نخدم نحل الكرية الأولى على شكل بيضاوي وتكون رقيقة بزاف نحلوها بمساعدة الفرينة ، كطبقة أولى نحط الجبن المبشور ثم القطع الدجاج.
ملاحظة: كمية الفرينة عطاتني خمسة كريات متوسطة الحجم

ونقطع الكفتة فوق الدجاج نزيد الصلصة اللي حضرناها يمكن استبدالها بالصلصة الجزائرية، نضيف الجبن الخاص بالساندويتش ومن فوق الجبن المبشور، بالنسبة لطي نجيبو الجزء الأيمن ونحطوه فوق الحشو ونزيدو الجزء الأيسر ونحطوه من فوق ونجبدو شوية ونغلقو الأطراف مليح.

ونلويو الأطراف كيما حبة الحلوة ونقطعو العجين الزائد كما هو موضح في الصورة والحبة اللي نكملها نحطها فوق صينية الفرن مفرشة بورق الزبدة من الأحسن، نحطها من جيهة الفتحة، ندهنها دهنة خفيفة بالزيت وندردر الفرماج المبشور من فوق وندخلها للفرن المسخن مسبقا تقريبا 25 دقيقة كي يطيبو من تحت نشعل عليهم من فوق باش يديو تحميرة شابة.

كي يطيبو نحطهم فوق مشبك باش يبردو شوية من الأحسن نقدمو هاد الساندويتش وهو دافي، قدمتو مع عصير الليمون كنت حطيت الوصفة من قبل، والصلصة اللي خدمناها من قبل كيما نقدرو نرافقوه بالبطاطا مقلية.

وبالصحة ولهنا 😋😋.