نضع في قصعة سميد فرينة ملح خل عسل ولموهم بماء حتى نتحصل على عجينة ثم نبدأ بعملبة دلك ندلكو مليح كل ما ندلكو نخوه يرتاح و نعاودو ونعاودو حتى تولي عجينة تطرطق في يدك ونقطعوهم كريات متوسطين نجبو سنية ندهنوها بزيت مليح ونحطو فيها كريات نتاعنا ونغطوهم ونخلوهم يرتاحو

ثم نوجدو بول تاع سميد و بول تاع زيت و بول تاع زبدة دائبة

ثم نبدو بعملية فتح العجية بالزيت نديروها مستطيل باش تساعدنا في الخدمة ومنفتحو بزبدة وسميد كل ما نطبقو نديرو سميد وزبدة ما تنسوش لازم سميد و زبدة باش يجي مورق

ونبدو نطبقو فيا غير بشوية نرفدو العجين من جهة نجيبوه في وسط

نزيدو جهة تانية نقابلوها مع جهة اولى

ونزيدو نطبقوها على اثنان ونولو نطبقو متل مربع من جهة اعلى و نطبقو ونطبقو حتى تكمل عجينة وتولي مربع

من نكملو قاع كريات ندروهم مربعات نعودو ندهنو سنية نعودو نخلوهم يرتاحو مليح

ومن يرتاحو نبدو نقرصو بلوحدة و نديرو في طاجين او مقلاة او اي حاجة تعتمدو عليها متلسقش

وعسل لي ضفناهلو يعطيه احمرار من يطبو جميع حبات نقسمو حبة على اثنان ونعمروها بلكاوكاو مع عسل هي من احسن يكنو كل مكسرات لاكن كل واحد ويدير على حسابو ونعمر ونشكلو كورني ونحكموه بكوردو ونقدموهم في طبق للمناسبات و شهيتكم في جنة