بسم الله اللهم صلي وسلم على نبينا محمد في اناء نضع السمن والزيت والحليب والفاني قرصة ملح والفاني نخلط الكل مليح ومن بعد نضيف الفرينة مغربلة بالتدريج

حتى نتحصل على عجين طري ناعم نشكل كريات بحجم حبة الجوز نتركهم يرتاحو ربع ساعة

هنا الحشو كنت محضاتو ليلة من قبل باش ما يتلاصقش في اليد بسطت العجين مدور وشكلت الحشو حرف yمن بعد طويت العجين كما موضح وشكلت حبة العرايش

كملت كل الكمية وماذابيكم تتركو حبة العرايش ترتاح على الاقل ساعتين قبل الطهو

هنا بديت نحضر القلاساج بعد ما طابت العرائش وبردت في إناء وضعت كيلة ماء الزهر وكيلة زيت وعصير ليمونتين خلطتهم مليح ثم اضفت الملون الابيض

وتابعت الخلط وبديت اضيف في السكر بالتدريج حتى تحصلت على قلاساج ابيض ناعم درت اختبار احلى عرايش لقيتو مليح وكملت كل الحبات

ومن بعد ما كملت القلاساج ونشفت مليح جناح من حبة العرايش دهنتو بشاربات كانت عندي محضرة وعاقدة ولصقت حبيبات الحلوة كما موضح وزينت الحبة تع العرايش بملمع غذائي وبوردة لما نشفت تماما وضعتها في حاويات حلوة

وقدمتهم الصورة على ما أضن راهي تحكي على نفسها جات بزاف هشيشة وبنينة وقلاساج هذي الطريقة يقعد طري لمدة طويلة بزاف نتمنى تعجبكم وربي يدوم افراحكم أن شاءالله