نحضر مكونات الكريمة البيضاء ونبدأ باسم الله، في كاسرونة نفرغ 70 ملل من الكريمة السائلة ونحطها تسخن نفرغ عليها قطع الشكولا البيضاء نحرك مليح حتى ذوب نحيها من على النار ونضيف الغلوكوز ونخلط جيدا حتى تتجانس المكونات

ثم نضيف الكريمة السائلة (180 ملل) تكون باردة نخلطها بسرعة حتى تتجانس المكونات مع بعضها نفرغها في علبة محكمة الغلق ونحطها في الثلاجة مدة ليلة كاملة تبرد.

من بعد نحضر كولي 🥝 الكيوي، نقطع الكيوي اللي عندي حوالي 100 غ ونضيف عليهم السكر ونخليها تطلق الماء مدة 15 دقيقة تقريبا.

نفرغ الكميـة فــي كاسرونـة ونحطها فوق النار كي تبدأ تغلي نعصر عليها نصــف حبـة ليمـون حوالي ملعقة كبيرة ونخلط مليح ما نخليهاش فوق النار بزاف غي تغلي نطفي عليها ونفرغها في طاس الميكسور ونميكسيها مليح.

بنفس الطريقة نحضر كولي 🍓 الفراولة المهم نقطع الفراولة ونخلطها مع السكر ونخليها تطلق الماء مدة مدة 15 دقيقة تقريبا.

نفرغ الفراولة في كاسرونـة ونحطها فوق النار كي تبدأ تغلي نعصر عليها نصــف حبـة ليمـون حوالي ملعقة كبيرة ونخلط مليح ما نخليهاش فوق النار بزاف غي تغلي نطفي عليها ونفرغها في طاس الميكسور ونميكسيها مليح، كنت 👈🏻حطيت من قبل وصفة لكولي الفراولة حتى هي تجي روعة يمكن تفقد الوصفة من خلال هذا الرابط👇🏻

لغذة من ذاك نخرج الكريمة من الثلاجة ونوزن جبن كيري حوالي 90 غ يمكن استبدال جبن كيري بجبن ماسكربون أو حتى جبن ريجيم حتى هو يفي بالغرض.
ملاحظة مهمة: ✔يمكن تحضير الكريمة والكوليات في نفس اليوم (في الصباح) وحتى للمساء باش نكملو الخدمة بلا نخليوهم يباتو.

نفرغ الكريمة في إناء ونطلعها شوية وفي إناء آخر أو غرفية نضرب الجبن مليح باش يولي كريمي.

نضيف الجبن فوق الكريمة ونكمل نضرب حتى يتضاعف حجمها وتولي كثيفة.
ملاحظة مهمة: ✔في الكريمة ما ضفناش السكر كتفينا ببحلاوة الشكولا ومع الجبن ما تجيش حلوة بزاف تجي بنينة.

في هاذ الوقت نطحن البسكوي للأمانة درت عيني ميزاني ما وزنتش، ضفت عليه البرالان يمكن👈🏻 تفقد الوصفة من خلال هذا الرابط👇🏻 هو يزيد شوية في البنة لكن يمكن الإستغناء عليه، فرغت البسكويت في كؤوس التقديم بدون ما نضيفلو ولا شيء (لا زبدة ولا حليب)

عمرت الكريمة في الكيس الحلواني، فرغت فوق البسكوي وبالتحديد على حواف الكؤوس توبينغ الفراولة الجاهز (صلصة الفراولة) ثم الكريمة.

ثم فرغت كولي الكيوي على حواف الكؤوس والفراغ اللي في الوسط حطيت فيه قطع من الكيوي.

ثم الكريمة ومن فوق فرغت كولي الفراولة وزينت بوريدات من الكريمة والقاوقاو إيفلي ذوق البيستاش وقطع صغيرة من الكيوي والتزيين يبقى دائما حسب الرغبة وحسب الموجود.

ودخلت الكؤوس للثلاجة لحين التقديم.

وشهية طيبة 😋👌🏻😋

تجي بزاف بنية وبألف صحة وهنا😋