نوجـد كل المكونات ونبدأ على بركة الله، في إناء نحط كيلة البيض جاتني خمس حبات بيض
وبياض أما صفار حبة بيض خليتو للتلميع، نضرب البيض والسكر وقرصة الملح وعطر الزبدة بالباتور حتى يذوب السكر تماما.
ملاحظة: ✔الكيلة اللي استعملتها هي غرفية متوسطة

نضيف عليه الزيت بالتدريج مع التحريك المستمر ثم نضيف بشر البرتقال والليمون ونضرب مليح حتى تتجانس كل المكونات.

نفرغ الخليط في إناء أكبر باش يساعدني في لم العجين، ثم نضيف الحليب بودرة ولفاني والمايزينة والخميرة الكيميائية نحرك بالسباتول فقط حتى تتجانس كل المكونات، في الأخير نضيف الفرينة بالتدريج نكون مغربلتها.
ملاحظة: ✔إضافة عطر الزبدة إختياري لكنه يعطي مذاق رائع للحلوة.

حتى نحصل على خليط يلصق شوية في اليد (ما لزمش تكون يابسة هي كي تريح تنشف شوية) نخليها ترتاح تقريبا 30 دقيقة الوقت اللي نضف فيه سطح العمل ونبدا نخدمها نحل العجينة بين زوج بلاستيك غذائي بسمك 01 سم تقريبا و نشكلها بالمراشم (الطوابع) حسب الرغبة
ملاحظة: لازم الطابع نرشوه بالفرينة باش ما تلصقش فيه العجينة

نستفو الحبات في صينية فيها ورق الزبدة من الأحسن، ندهن السطح بصفار حبة بيض المخلطة مع قهوة سريعة الذوبان (نكون حليتها في شوية ماء) ومن فوق ندردر شوية سكر أو حبيبات الحلوى الملونة.

ندخلها للفرن المسخن مسبقا على درجة حرارة متوسطة كي طيب من تحت نطفي عليها ونشعل عليها من فوق تدي لون ذهبي موحد تجي مشققة ومين تكون طيب تعطي رائحة جد طيبة.

وها هي واجدة وتقدم بالصحة والهنا، عطاتني كمية لاباس بيها.
ملاحظة مهمة: ✔الكمية تبقى على حسب الكيلة المستعملة.