نوجد كل المكونات ونبدأ على بركة الله، نقي البطاطا ونقطعها دوائر نحطها في كسكاس مع وريقات الرند ونحطها فوق القدرة تفور مدة 10 دقائق، ثم نقطع البصل شرائح وكذلك الطماطم.

في إناء نحط التوابل (الطماطم المصبرة والسكين جبير والخل والملح والزيت وفلفل الأحمر الحلو والحار والفلفل الأسود والكركم وتابل الشاورما والزعيترة والثوم مقطع) ثم نصب عليهم ماء دافيء ونخلط جيدا حتى تتجانس كل المكونات.
ملاحظة: ✔سعة الكاس اللي عبرت بيه الماء 200 ملل.

البطاطا تكون فارت (لازم تكون نص طياب فقط) نفرغها وهي سخونة في التتبيلة مع الطماطم والبصل اللي كنت قطعتهم شرائح خلطت الكل جيدا وفي الأخير ضفت القليل من المعدنوس مرحي وعاود خلطت حتى نساجمت كل المكونات خليتها في التتبيلة مدة 10 دقائق كيما تقدرو تفرغوها في الصينية مباشرة.

دهنت الصينية تدخل للفرن (استعملت صينية زجاجية بايريكس) بالزبدة وفرغت الخليط اللي ارتاح شوية.

غطيتها بورق الزبدة (كنت شمختو باش نقدر نتحكم فيه) ومن فوق ورق الألمنيوم ودخلتها للفرن المسخن مسبقا مدة 30 دقيقة تقريبا

كي طابت نحيت الورق (الطهي والألمنيوم) وشعلت عليها 5 دقائق من فوق تدي لون موحد.

وقدّمتها بألف صحة وهنا جات بنينة عسل👌🏻😋👌🏻.