نحضّر كل المكونات ونبدأ باسم الله، أولا ندهن القالب بمادة دهنية (نفضل السمن عن تجربة) ونغبرو بالفرينة كتحضير أولي ونخليه بجيه، نقطع طابليطة الشوكولا إلى قطع صغيرة، في إناء نحط البيض والسكر رشة ملح.

ملاحظة مهمة: ✔ الكاس اللي استعملتو سعته 220 ملل.

نضرب المكونات بالضراب اليدوي (الفوي) حتى تتجانس المكونات ونحس أنّ السكر ذاب شوية نضيف الفانيلا وعطر الزبدة نخلط ونضيف الزيت بالتدريج مع الخفق المستمر.

ثم نضيف كاس ياغورت سائل ذوق الموز بالتدريج حتى تنسجم كل المكونات، في الأخير نضيف الفرينة والخمارة (نغربلهم بطبيعة الحال).

ندخل النواشف بالفوي دائما (الضراب اليدوي) نكتب رقم 8 يبقى شوية عاد يختفي هذاك هو القوام المطلوب.
ملاحظة مهمة: ✔الفرينة 2 كيسان ونص ممكن أكثر او أقل على حسب درجة امتصاص الفرينة لسوائل وتاني على حساب حجم البيض اللي نستعملوه.

ثم نضيف حبيبات الشوكولاتة الجوز (القرقاع) (نكون غبّرتهم بملعقة فرينة وغربلتهم للتخلص من فائض الفرينة).

ندخلهم في خليط الكيك برفق، نفرغ الخليط في القالب نعلي يدي شوية باش الكيك يجي مهوّي.

نخبط المول فوق سطح العمل لكي يستوي سطح الكيك. ونفوّت الموس (السكين) صاير داير على الخليط كما هو موضح في الصورة، هاذ الحيلة تساعد الخليط باش يتشقق وينتفخ كي يكون يطيب، نحط 6 أنصاص جوز من فوق (للأمانة كي طاب الكيك دخلو للوسط ما بقاوش من فوق).

ندخل القالب للفرن المسخن مسبقا 10 دقيقة الأولى على نار مرتفعة ومن بعد نقص نار أقل من المتوسط ونخليه يطيب على خاطرو إجمالي الطهي 45 دقيقة. كي طيب نخليها تهدى شوية ونقلبها على مشبك.

ونخليها تبرد مليح، الكيك يجي رطب.

كي تبرد الكيكة تماما نفرغ عليها صوص الكراميل المجهزة من قبل كنت 👈🏻حطيت الطريقة بالتفصيل يمكن تفقد الوصفة من خلال هذا الرابط👇🏻 و زينتها من فوق بقطع الجوز.

وقدّمتها بألف صحة وهنا 😋☕🍫😋

تجي خفيفة وبزاف بنينة😋 كي القطن 👌🏻.

وشهية طيبة 😋👌🏻😋.