اول شيء نضع السميد في إناء مفتوح ونضيف له القليل من الماء ونبدا في جمعه كي يتجمع نبدا نعجن فيه الي عندها بيترا ديرو فالبيترا يتعجن وخلاص والي ماعندهاش تدلكوا مليح على القسى باه مايفسدش بالماء.

باه يسهال العجن نجيب كسرونة فيها ماء نغليه مليح ونحط فيه ساشي ونخرجها وهي مبلولة نحط فيها العجينة ونخليها ترتاح مدة ساعة على الاقل.

في هذه الأثناء نحضر الحشو نجيب بصل نقيه مليح و نغسلو ونقطعو رقيق ، نزيدلو شوي دبشة ونحطو على نار ينشف من الماء

نزيد الزيت ونقليه ثم التوابل والطماطم والفلفل وطماطم مصبر

في الاخير نضيف الاشياء الي نحبها نكهة مثلا تونة او جبن او بصل اخضر...

كي ترتاح العجينة نحيها من الكيس ونضيفلها الملح ماننساهش و نعجن مليح كل مرة نبل يديا فقط ونعجن حتى تتعجن مليح

نجيب صينية ندهنها بالزيت ونلوز وندهن اللوزات بالزيت ونغطيهم بسيلوفان والا كيس ونخليهم يرتاحوا على الاقل ساعة اخرى

كي يرتاحوا نسخن الطاجين او المقلاة الخاصة

ثم نرشها بالزيت

ونفتح اللوزة الاولى رقييييقة على صينية وكاين الي يستعمل الغربال

ونحط الحشو

ونزيد نفتح لوزة اخرى رقيييق ونحطها فوق الحشو ونغلق الاطراف جيدا

ونطيبها على الطاجين نار متوسطة في طابونة خير من الجهتين

ونكمل البقية 👌 بنفس الطريقة