نحضر كل المكونات ونبدأ باسم الله، في إناء نحط السكر الناعم والمارغرين مع رشة الملح ومركز عطر الليمون الأصفر نخلط الكل جيدا بيدي فقط حتى يصبح الخليط كريمي.

ثم نضيف حبة بيض مع مبشور حبة ليمون صغيرة ونكل نخلط جيدا حتى تتجانس كل المكونات.

ثم نضيف النشاء مع خميرة الحلويات ونبدأ نلم بالفرينة تكون مغربلة بطبيعة الحال (نلموها برك ما نعجنوهاش) حتى نتحصل على عجينة ملساء نخليها شوية طرية نغطيها ونحطها في الثلاجة الوقت اللي نظف فيه مكان العمل، تقريبا 10 د.

نجيب القوالب اللي حابة نستعملهم أنا استعملت شكل مربع صغير نوعا ما ملأت كل القوالب كما هو موضح في الفيديو ودرت ثقوب حطيتهم في صينية ودخلتهم للفرن المسخن مسبقا على درجة حرارة متوسطة.

خليتهم داو لون ذهبي (نحب الصابلي محمر) كي طابو ديموليتهم وخليتهم فيوق مشبك يبردو مليح.

في هاد الوقت وجدت الحشو في غرفية فرغت كرانشي الليمون وضفت عليه جوز الهند خلطت الكل جيدا.

ستفت القوالب في صينية جزء فرغت فيه ملعقة صغيرة من فوراج بذوق الفواكه الإستوائية (زادلو في البنة) والجزء الآخر حطيت فيه كرانشي الليمون مع جوز الهند وغلقت على الحبات كما هو موضح في الفيديو، بنفس الطريقة كملت كل الكمية اللي عندي.

من جهة أخرى ذوبت الشكولاطة البيضاء وضفت عليها الزيت مع مركز عطر الليمون اللأصفر (لون وذوق) خلطت الكل جيدا حتى انساجمت المكونات وبديت نقلاصي في حبات الصابلي اللي عندي.

الحبة اللي نقلاصيها نحطها في صينية مغلفة ببلاستيك غذائي وقبل ما تجمد الشكولاطة نحط التزيين (عجينة السكر على شكل حبات ليمون صغيرة) في طرف المربع

خليتهم ينشفو وتيبس الشكولاطة وعمرتهم فلبة محكمة الغلق.

ونقدموه بألف صحة وهنا 🥰🍋🥰.

يجي بزاف بزاف بنين إنتعاش وقرمشة وشهية طيبة للجميع😋👌🏻😋.