نوجد كل المكونات ونبدأ على بركة الله، أول حاجة ندهن المول بالسمن وندردر عليه الفرينة ونخليه بجيه، في إناء نحط البيض مع رشة ملح ومركز عطر الشكولاتة والسكر.
ملاحظة مهمة: ✔الكاس اللي عبرت بيه كل المقادير سعته 160 ملل.

ونضرب مليح بالباتور (الضراب الكهربائي) حتى يذوب السكر تماما ويبياض شوية الخليط. نضيف الزيت بالتدريج مع الخفق المستمر.

ثم نضيف اللبن مع مواصلة الخفق حتى نحصل على خليط متجانس، ثم نضيف النواشف (الفرينة والخمارة والكاكاو البني المر) نغربلهم أكيد، نضيفهم على دفعات نخلطها بالفوي (الضراب اليدوي) فقط.
ملاحظة: ✔من الأحسن ما ضيفوش الفرينة على دفعة واحدة، في الأول ضفت كاس فرينة حسيتها عاد خصها كملت نصف الكاس

نضرب حتى تنسجم كل المكونات نتحصلو على خليط ما ثقيل ما خفيف كي نكتبو رقم 8 يبقى شوية ويختفي. نفرغ الخليط في المول من الأحسن نرفع يدي للأعلى ونفرغ باش يجي الكيك مهوي، نسوي السطح بعود الشواء كما هو موضح في الفيديو.

نهز المول ونخبطو فوق سطح العمل باش نتخلصو من الفقاعات ويجي السطح مستوي، ندخل المول للفرن المسخن مسبقا على درجة حرارة متوسطة تقريبا 25 دقيقة. كي يطيب الكيك نخليه يهدأ شوية ونقلبو على مشبك.

يجي رطب وإسفنجي تقول مشرب، نخليه يبرد بجيه.

في هاذ الوقت نوجد كريمة الشكولاتة، في كاسرونة نفرغ الحليب نضيف عليه السكر مع كيس كرام ديسار ذوق الشكولاتة نخلط بارد في بارد ونحطها فوق النار تكون متوسطة مع التحريك المستمر.

حتى يبدي يغلي يعقاد ويثقال، نطفي عليها ونضيف قطع الشكولاتة (استعملت ماكسون) مع مركز عطر الشكولاتة وملعقة صغيرة زبدة مع رشة خفيفة ملح نخلطها مليح.

نحاول نبرد الكريمة شوية ونفرغها في هذاك الفراغ نحاول نسويها مليح ونخليها تبرد.

كي تبرد مليح وتحكم روحها، في هاذ الوقت نوجد قناش الشكولاتة، في كاسرونة فرغت الحليب مع قطع الشكولاتة السوداء وملعقة صغيرة زبدة ذوبتها فوق النار مع التحريك المستمر خليتها حتى ولات دافية عاد فرغتها فوق الكريمة ومشيتها مليح على السطح.

وزينتها صاير داير بحبيبات الشكولاتة الرقيقة (أبيض وأسود) وكملت زينت بالحلقومة على شكل توت.

وقدّمتها بألف صحة وهنا 😋🍫😋

شهية طيبة للجميع 🤩😘🤩

تجي بزاف بنينة😋🍫 👌🏻